17/05/2026
د پټان راډیویي ښوونځي د PRS پوښتنبانکونو د لویې علمي سیالۍ د پایلو ابلاغ غونډه ترسره شوه.
پد پټان راډیویي ښوونځي د (PRS) پوښتنبانکونو د لویې علمي سیالۍ د پایلو ابلاغ غونډه د یو لړ شاندارو مراسمو په ترڅ کې ترسره شوه. چې پکې د سیمې د بېلابېلو تعلیمي مرکزونو استازو، استادانو، قومي مشرانو، زده کوونکو او د هغوی د کورنیو غړو په پراخه کچه ګډون کړی درلود.
دا لویه علمي سیالي چې یوه میاشت وړاندې د پټان راډیویي ښوونځي د ادارې لخوا په لاره اچول شوې وه، چې موخه یې د زده کوونکو د علمي ظرفیت لوړول، د هغوی هڅونه او په ټولنه کې د مطالعې د دود ژوندي کول وو. په یاده دغه سیالۍ کې په سلګونه تنو زده کوونکو برخه اخیستې وه، چې له ډلې یې شاوخوا ۳۰۰ تنه زده کوونکي بریالي اعلان شول او د غونډې د مسوولینو لخوا په ځانګړو مادي او معنوي ډالیو ونازول شول.
د مراسمو په جریان کې د سیمې تعلیمي مرکزونو استازو، د پټان راډیویي ښوونځي د دغه بېساري ګام او پرله پسې هڅو ستاینه وکړه او د دا ډول علمي برنامو دوام یې د نسلونو په روزنه کې حیاتي وګاڼه.
• د ځواک خصوصي ښوونځي مدیر، ګلاب دانش د پټان راډیویي ښوونځي روزنیزې او علمي برنامې د پکتیا او شاوخوا سیمو د ځوانانو لپاره د پوهې د رڼا سرچینه وبلله. نوموړي زیاته کړه چې دغه راډیویي د خویندو لپاره ګټور تمام شوی دی.
د غونډې په دوام، د سیمې نورو تعلیمي شخصیتونو لکه د افغان دانش خصوصي ښوونځي مدیر خان محمد افغان، د بګیاړو منځني ښوونځي مدیر عبدالبصیر پردېس او دڅمکنیو کثیرالرشتوي انسټېټیوټ مدیر جاوېد مشال هم ویناوې وکړې او په داسې شرایطو کې یې د راډیویي ښوونځي د ارزښتمنو تعلیمي خدمتونو ستاینه او ننګه وکړه.
• د پټان غږ راډیو مسؤل مدیر بخت زائیل څمکني ټولو بریالیو زده کوونکو او د هغوی کورنیو ته د مبارکۍ ورکولو ترڅنګ، د یادې سیالۍ د رڼې پروسې په اړه د بشپړ شفافیت ډاډ ورکړ. همدا شان د پټان راډیویي ښوونځي مسؤل نسیم حقمل او عبدالخالق عاطف هم زده کوونکي او د هغوی کورنۍ وستایلې او په خپلو خبرو کې یې د دې سیالۍ پر روڼتیا او عادلانه والي ټینګار وکړ.
• د پټان غږ راډیو رئیس رحمت الله هېوادمل په خپلو خبرو کې زیاته کړه چې دا د پټان راډیویي ښوونځي لخوا دویمه لویه علمي سیالي وه چې د ولسونو له تود او پراخ هرکلي سره مخ شوه. نوموړي ژمنه وکړه چې د پټان راډیویي ښوونځي اداره به په راتلونکي کې هم د پوهې او رڼا د خپرولو لپاره خپلو هڅو ته په کلکه دوام ورکړي.
دا لومړی ځل نه دی چې پټان راډیویي ښوونځی داسې سترې او برخلیک ټاکونکې علمي سیالۍ په لاره اچوي، بلکې له دې وړاندې یې هم یوه لویه علمي سیالي په بریالیتوب سره پای ته رسولې وه.
پټان راډیویي ښوونځی چې له نن څخه دوه کاله وړاندې د مسلکي ښوونکو په شتون او د غښتلو او پرمختللو رسنیزو وسایلو پر مټ، د وخت او سیمې د اړتیاوو پر بنسټ رامنځته شو، ډېر ژر وتوانېد چې خپل ځانګړی تعلیمي سیستم تر ټولې پکتیا، لوګر او خوست ولایتونو پورې وغځوي او د زرګونو تږو زده کوونکو علمي تنده ماته کړي.
16/05/2026
15/05/2026
15/05/2026
15/05/2026
14/05/2026
13/05/2026