Moo English

سؤال يبان عادي.
ميس... هو أنا شاطر؟
📖 أهلاً بيكي صديقتي المعلمة... في
ودا بوست رقم 3 💜
في وسط السيشن، وبعد ما خلصنا النشاط، طفل صغير شدني من إيدي وسألني سؤال غريب شوية...
"يا ميس... هو أنا شاطر؟"
بصراحة استغربت.
لأن الطفل ده كان حالل النشاط صح، وشارك في السيشن، وعمل كل المطلوب منه.
فقلتله: "طبعًا يا حبيبي... إنت شاطر جدًا." 💜
ابتسم وقال: "أصل محدش قالي كده النهارده." 🥹
..
في اللحظة دي فهمت حاجة مهمة.
إحنا ساعات بنركز على الغلطات اللي محتاجة تتصلح... وننسى المجهود اللي يستحق التشجيع.
ومن يومها بقيت أحاول أمدح المحاولة قبل النتيجة، والمجهود قبل الدرجة.
لأن كلمة حلوة ممكن تفرق مع طفل أكتر من أي نشاط أو لعبة. 💜
📝 معلمة شاطرة بتقول:
الأطفال بيكبروا بالكلمات اللي بنقولها لهم... فاختاروا كلماتكم بعناية. 🌷
💬 سؤال اليوم:
إيه أكتر كلمة تشجيع كنت بتحبي تسمعيها وإنتِ صغيرة
او بتستخدميها مع اطفالك في السيشن ؟ ❤️👇 :::

✨ كل ما نقدمه في Moo English بين إيديكم 💜 سلاسل متنوعة، أفكار ملهمة، ومحتوى بيتجدد باستمرار عشان رحلتكم معانا تفضل ممتعة ومفيدة 🐮📚

"علِّم معلم واحد صح... أفضل من ألف طفل."

الجملة دي كانت من أكتر الجمل اللي غيرت مساري المهني.

بعد ما كنت بدرس للطلبة، بدأت رحلتي في تدريب المعلمين. ولأني مؤمن جدًا بقيمة تأسيس الأطفال، لقيت نفسي بتعامل مع المعلمات أكتر، وبدور فيهم على "المعلمة الأم"... أو يمكن الأدق أقول "الأم المعلمة".

لأني مهما كانت خبرتي أو مهاراتي، عمري ما هعرف أعمل مع الطفل اللي معلمة شاطرة ومخلصة تقدر تعمله بكل حب وهي مغمضة.

أنا محمد عبده، مدرب إنجلش معتمد ومؤلف منهج Moo Phonics و Moo Grammar.

وبالمناسبة، خبرتي في تدريس الإنجليزي بدأت من وأنا في تانية ثانوي... آه زي ما قريت كده! بس دي قصة أحكيها لكم بعدين.

أما تدريب المعلمين فدي رحلة بدأت من سنة 2020 ومستمر فيها لحد النهارده.

بحب شغلي أكتر بكتير مما تتخيل، يمكن لأن ده كان حلمي من وأنا طفل اللي عمري ماغيرته، وربنا كرمني إني أشتغل الحاجة اللي بحبها فعلًا.

هدفي دلوقتي إني أساعد في تأهيل معلمين وأولياء أمور يقدروا يأسسوا أطفالنا بأفضل وأكفأ الطرق الممكنة.

وعلى قد ما بحب شغلي، فأنا متأكد إن فيه أمهات ومعلمات كتير بيحبوا شغلهم أكتر مني كمان، وعشان كده بحس إن أي معرفة أو خبرة عندي لازم أوصلها لكل حد شغوف وعايز يتطور.

مش عايز ييجي يوم أكبر فيه، وأقعد في البلكونة بشرب قهوة، وأكون محتفظ لنفسي بمعلومة واحدة كان ممكن تفيد حد أو تغير حياة طفل.

ربنا يوفقنا جميعًا، ويقدرنا نقدم شغلنا بإخلاص، ويجعل أثرنا طيب في حياة أطفال كتير.

"لو قدرنا نطوّر معلم واحد أو أم واحدة... ممكن نكون ساهمنا في تغيير مستقبل مئات الأطفال."

دعواتكم بالتوفيق 💜
محمد عبده

ياترى مين هيكون بطل التحدي النهارده من اطفالنا؟ 🤩🏆
جهزوا الألوان ✏️ جهزوا التركيز 👀 وخلي بطلك يبدأ المهمة! 🌟
📝 المطلوب:
✅ حملي الشيت.
✅ خلي بطلك يحله بنفسه.
✅ صوري الشيت بعد الحل.
✅ نزليه في الكومنتات مع اسم الطفل ( اكتبي اسم الطفل ثلاثي بالانجلش صح ).
🎁 وكل بطل هيشارك معانا هيحصل على شهادة تقدير باسمه من Moo English. 🏆✨
❤️ افتكرى يا مامي:
إحنا هنا مش بندور على الطفل اللي بيحل كل حاجة صح...
إحنا بنحتفل بالطفل اللي بيحاول ويتعلم ويستمتع.
📸 مستنيين صور الأبطال في الكومنتات... سواء حابه تبعتي صورة الشيت بس او صورة الشيت وطفلك ماسكه وفخور به 💪
✅️ مهمة انهاردة :
/p/
Sound blending
الشيت في اول كومنت 😍👇🏻

ويلا نشوف مين أول نجم هيخطف قلوبنا النهارده! ⭐😍👇
​ 's_Club

الطفل اللي كان بيكره الإنجليزي... 😅

اهلا بيكى صديقتى المعلمة في

ودا البوست رقم 2

أنا معلمة...
وده معناه إني قابلت أطفال كتير بيكرهوا الإنجليزي.
لكن الطفل ده كان حالة خاصة.
أول ما أقول: "يلا يا أبطال نبدأ إنجليزي"
ألاقيه عامل وش كأنه داخل امتحان ثانوية عامة. 😂
كل كلمة جديدة يقول: "صعبة"
كل نشاط يقول: "مش عارف"
كل لعبة يقول: "مش هعرف أكسب"
في الأول افتكرت إن المشكلة في الإنجليزي.
لكن بعد فترة اكتشفت إن المشكلة عمرها ما كانت في اللغة...
المشكلة كانت في كلمة واحدة:
"خايف"
خايف يغلط. خايف ينطق غلط. خايف الأطفال تضحك عليه وتحكم عليه انه مش شاطر زيهم.
فقررت أغير الطريقة.
بدل ما أقول: "قول الكلمة صح"
بقيت أقول: "جرب الأول."
وبدل ما أركز على الغلط، بقيت أحتفل بالمحاولة.
وبعد كام حصة...
نفس الطفل بقى أول واحد يرفع إيده عشان يقرأ. ❤️
📝 ملحوظة معلمة شاطرة:
في تعليم الإنجليزي فيه قاعدة مهمة جدًا:
Confidence before Accuracy
يعني الثقة قبل الدقة.
لأن الطفل الواثق هيغلط ويتعلم.
لكن الطفل الخايف غالبًا مش هيحاول أصلًا.
💬 سؤال اليوم:
لما كنت بتتعلم إنجليزي... كنت بتتكلم حتى لو هتغلط؟ ولا كنت بتفضل ساكت لحد ما تتأكد 100% إنك صح؟ 👇

🚨 لكل ماما ومعلمة بتدور على تأسيس صح بجد في اسكندرية... 🚨

كتير من الأطفال بيقضوا سنين في تعلم القراءة والكتابة، ومع ذلك بيواجهوا صعوبة في القراءة بطلاقة أو الكتابة بشكل صحيح.

لكن السؤال الأهم: هل المشكلة في الطفل؟ ولا في طريقة التأسيس نفسها؟ 🤔

عشان كده بنقدملكم MOO CLUB 🐄📚

سيمينار مجاني في الإسكندرية هنتكلم فيه عن:

✅ المعايير العالمية اللي لازم تكون موجودة في أي منهج تأسيس قراءة وكتابة وازاي منهج مو طبقها بالكامل 👌
✅ إزاي تفرقي بين المنهج القوي والمنهج اللي شكله حلو بس نتائجه ضعيفة
✅ أسرار بناء أساس قوي يخلي الطفل يتعلم أسرع ويكمل بثقة
✅ أشهر الأخطاء اللي بتأخر مستوى الأطفال من غير ما ناخد بالنا
✅ إيه اللي بتعمله البرامج الناجحة عالميًا عشان تحقق نتائج حقيقية

🎯 السيمينار مناسب لـ: 👩‍🏫 المعلمات 👩 الأمهات 🏫 أصحاب الحضانات والمراكز التعليمية 📚 كل شخص مهتم بتعليم الأطفال بشكل صحيح

🔥 الحضور مجاني بالكامل 🔥 محتوى عملي ومفيد 🔥 عدد الأماكن محدود

📅 الأربعاء 24 / 6 📍 الإسكندرية

📲 للحجز والاستفسار عبر واتساب:
+20 10 31388755

💜 MOO CLUB
لأن التأسيس مش مجرد تعليم حروف... التأسيس هو بناء مستقبل كامل للطفل. ✨📚🐄

"الطفل الوحيد اللي ماكنتش بحبه في السيشن..." 😳

أنا معلمة واسفة إني بقولها!

📖 أهلاً بيكي صديقتي المعلمة في 💜
وده البوست رقم ١

✅️ كان فيه طفل أول ما أدخل السيشن ألاقيه أول واحد بيتكلم، وأول واحد يعترض، وأول واحد يقلب خطة الحصة كلها. 😅

لو شرحت حاجة... يناقشني.
لو بدأنا نشاط... عنده اقتراح أحسن.
ولو طلبت تركيز... عنده ألف سؤال. 😂

وبصراحة؟ كنت كل ما أشوف اسمه أقول:
"ربنا يصبرني بجد!" 🤦🏻‍♀️

لكن مع الوقت لاحظت حاجة غريبة...
رغم كل مشاغباته، كان أول واحد يحضر، وأول واحد يشارك، وأكتر واحد يزعل لو غاب.

وفي يوم فهمت السبب...

هو ماكانش بيحاول يضايقني،
هو كان بيحاول يلفت الانتباه.
كان محتاج حد يسمعه ويحس بيه.

وساعتها أدركت إني كنت شايفة السلوك... ومش شايفة اللي ورا السلوك.

ومن يومها بطلت أسأل:
"الطفل ده مشاغب ليه؟"

وبقيت أسأل:
"الطفل ده محتاج إيه؟" 💜

📝 معلمة شاطرة بتقول:
مش كل طفل بيتعبك بيكون ضدك...
أحيانًا أكتر طفل بيستهلك طاقتك هو أكتر طفل محتاج احتواء.

💬 سؤال اليوم:
في رأيك... مين أصعب نوع أطفال في التعامل؟ 🤔👇