وحدة الغدد الصماء والسكر بمستشفى الأطفال الجامعي - جامعة أسيوط

🚑 إمتى لازم تتوجه بطفلك المصاب بالسكر للطوارئ فورًا؟

لو طفلك عنده أي من الأعراض دي:

🤮 قيء متكرر أو رفض الأكل والشرب
😨 صعوبة في التنفس أو سرعة في التنفس
🥱نعاس شديد أو فقدان للوعي
🙍 هبوط سكر شديد سكره أقل من ٦٠ ولا يتحسن بعد إعطاء السكر
😓ارتفاع شديد في السكر أكثر من ٢٥٠ مع وجود كيتونات في البول

💡 التصرف السريع في الحالات دي مهم جدًا لتجنب المضاعفات.

أسباب فقدان الوزن عند مرضى السكر✍️

فقدان الوزن من العلامات الشائعة التي قد تظهر عند بعض مرضى السكر خاصة في الحالات التي يكون فيها مستوى السكر مرتفع لفترات طويلة دون تشخيص أو دون انتظام على العلاج

عندما يرتفع مستوى السكر في الدم ولا يستطيع الجسم الاستفادة منه كمصدر للطاقة يبدأ في البحث عن مصادر بديلة للحصول على احتياجاته اليومية من الطاقة وهنا يبدأ الجسم في تكسير الدهون والعضلات مما يؤدي إلى فقدان الوزن بشكل ملحوظ🤕

ومن أهم أسباب فقدان الوزن عند مرضى السكر عدم كفاية الإنسولين أو ضعف تأثيره داخل الجسم حيث لا تتمكن الخلايا من استخدام الجلوكوز بصورة طبيعية فيلجأ الجسم إلى استهلاك مخزون الدهون والعضلات لتعويض نقص الطاقه😓

كما أن كثرة التبول الناتجة عن ارتفاع السكر تؤدي إلى فقدان كميات كبيرة من السوائل والسعرات الحرارية مما يساهم في نزول الوزن بشكل مستمر خاصة إذا كان المريض لا يتناول احتياجاته الغذائية بشكل كاف😒

وفي بعض الحالات قد يصاحب مرض السكر ضعف الشهية أو اضطرابات الجهاز الهضمي مما يؤدي إلى انخفاض كمية الطعام المتناولة وبالتالي زيادة فقدان الوزن🍅🍎☝️

ومن المهم الانتباه إلى أن فقدان الوزن السريع وغير المبرر عند مريض السكر قد يكون علامة تستدعي مراجعة دكتورك لتقييم الحالة وضبط العلاج والنظام الغذائي المناسب

الحفاظ على مستوى السكر في الحدود المستهدفة مع اتباع نظام غذائي متوازن يساعد على حماية الكتلة العضلية💪 والحفاظ على وزن صحي وتحسين جودة الحياة بشكل عام🏋️ مع ضرورة الاهتمام بشرب كمية كافية من الماء وخاصة في فصل الصيف 💧💧💧

هل ينفع نحقن الإنسولين من فوق الملابس؟

كتير من الناس بتتكسف تحقن الأنسولين في الأماكن العامة، فتفكر في حقن الإنسولين من فوق الملابس.
لكن هل ده صح؟ 🤔

❌ الحقن من فوق الملابس غير مُوصى به، لأنه ممكن يؤثر على دقة الجرعة ويصعّب التأكد من مكان الحقن وحالة الجلد وممكن يسبب عدوي وتلوث وكمان ممكن يأثر علي سن الإبرة ولا تعطي الجرعة

✅ الأفضل دائمًا كشف مكان الحقن وحقن الإنسولين مباشرة تحت الجلد بالطريقة الصحيحة.

صحتك اهم💙

🛑 "يا دكتور الواد خاسس ومبيطولش.. زمايله في المدرسة أطول وأعرض منه!"😭

🎤 ٤ علامات لازم تنتبهي ليها لو ابنك نموه واقف:

📌 ثبات الوزن والطول: الميزان ثابت لفترات طويلة، والهدوم مقاسها مش بيتغير ومبيطولش 🤏

📌 انتفاخ البطن والهضم الضعيف: بطنه دايماً منفوخة كأنه بلع بالونة، أو البراز بينزل فيه أكل غير مهضوم 🎈 دي ممكن تكون علامة لسوء امتصاص الاكل

📌 الإرهاق وضعف التركيز: مجهد بسرعة، تركيزه ضعيف، أو ناسي طول الوقت 🧠

📌 المناعة الضعيفة: دور البرد بيمسك فيه بسهولة ومبيخفش بسرعة 🤧

💡 الحل عمره ما كان في "فواتح الشهية" اللي بتنيم الطفل وتنفخه على الفاضي!

✅️الحل إننا ندخل جوه "مصنع جسمه" ونعرف إيه اللي معطل المكن وموقف المازورة قبل ما "فترة النمو الذهبية" تفوتنا! ⏳
ومن هنا لازم تلجأ الى طبيب غدد صماء
عندنا في مستشفى الاطفال الجامعى جامعة اسيوط عيادة الغدد شغالة الاثنين والاربعاء من كل اسبوع
ماتتأخريش واعرضي ابنك علي طبيب غدد صماء اطفال لو عنده العلامات اللي قولنا عليها ☝️

wa.me

رحبوا معانا بأجدد أصناف الانسولين Afrezza .... انسولين بيتم استنشاقه زي البخاخ بتاع حساسية الصدر (او الربو) .... تم اعتماده من FDA و جاهز للاستعمال
التجربة في الكبار ناجحة و حتى الان نتايج واعدة للأطفال فوق ٦ سنوات
هو ممكن يستعمل مكان الانسولين قصير المفعول و كده بنقلل الشكشكة من ٤ او ٥ شكات يوميا الى شكة او اتنين بالكتير 👍👍
ربنا ييسر و يجي مصر بقى 🤗🤗🤗 ويكون في متناول المرضي وفي التأمين الصحي

هل السكر اللي جه ل ابني انا السبب فيه يا دكتورة اصله كان بيحب الحلويات قوي؟
سؤال بتسأله امهات الاطفال المصابين جديد مش بس كده بيسمعو الجمل ده من قرايبهم وأهلهم😓 :
“أكيد كان بياكل شوكولاتة كتير…” 😒
“أصلهم مدلّعينه في الحلويات…”
“أكيد السكر جه من كتر السكريات…”
جمل مؤذية جدًا…
وللأسف كثير من أهالي الأطفال المصابين بالسكر النوع الأول يسمعوها بعد التشخيص 😔
الأم تشعر بالذنب…
والأب يبدأ يلوم نفسه…
وأحيانًا الطفل نفسه يحس إنه “هو السبب”.
لكن الحقيقة العلمية الواضحة جدًا:
📌 السكر النوع الأول ليس سببه أكل الحلويات.
📌 وليس بسبب خطأ من الطفل أو أهله.
📌 وليس لأن الأسرة “قصّرت”.
السكر النوع الأول في الأساس:
⚠️ مرض مناعي
يعني جهاز المناعة — المفروض يحمي الجسم — يبدأ بالغلط يهاجم خلايا البنكرياس التي تنتج الإنسولين 😳
ومع الوقت الجسم يفقد القدرة على إنتاج الإنسولين بشكل كافٍ.
يعني المشكلة الحقيقية ليست “كمية السكر اللي الطفل أكلها”…
المشكلة إن الجسم نفسه توقف عن إنتاج الهرمون الأساسي للحياة.
وبالتالي العلاج مايكون بالانسولين

لكثير من الأمهات بعد التشخيص يعيشوا في شعور قاسٍ بالذنب.😓
الأم تراجع كل أكلة أعطتها لطفلها…
كل قطعة شوكولاتة…
كل عيد ميلاد…
وتبدأ تعذب نفسها نفسيًا.
رغم إن الحقيقة إن النوع الأول مرض مناعي معقد… وما زال العلم لا يعرف سببًا واحدًا مباشرًا لحدوثه.
فيه عوامل وراثية…
وفيه عوامل مناعية وبيئية…
لكن ليس بسبب “كتر الحلويات” كما يشاع.
وفيه نقطة مهمة جدًا لازم نفهمها:
📌 أكل الحلويات لا “يصنع” السكر النوع الأول عند طفل سليم.
لكن طبعًا بعد الإصابة بالسكر… تنظيم الأكل والكربوهيدرات يصبح جزءًا مهمًا جدًا من العلاج.
وفيه شيء مؤلم جدًا يحصل أحيانًا للأطفال المصابين بالسكر 😔
بعض الناس تتعامل معهم كأنهم “أذنبوا” لأنهم مرضى.
الطفل يسمع:
“أنت جالك السكر عشان كنت بتاكل حلويات”
فيبدأ يشعر بالخوف أو الذنب أو الاختلاف عن باقي الأطفال.
وده يترك أثرًا نفسيًا سيئًا جدًا.
خصوصًا إن الطفل أصلًا يواجه تحديات كبيرة
أحيانًا كلمة خاطئة تجرح أهل الطفل أكثر من المرض نفسه 😔
الكلمة الطيبة صدقة ❤️

🩺 د.

أنا و السكر في العيد | الفتة واللحمة الضاني كل سنة وانتم طيبين
مش كل ارتفاع بعد الفتة سببه “الرز والعيش” بس! ولكن 👀
طبق الفتة فيه:
✅ كارب
✅ بروتين
✅ دهون
وده معناه إن السكر ممكن يعلى بسرعة…
أو يعلى متأخر بعد 3 لـ 6 ساعات 🤔

خصوصًا مع اللحمة الضاني لأنها أعلى في الدهون، والدهون بتبطّأ امتصاص الكارب و ممكن تزود مقاومة الإنسولين مؤقتًا وتسبب ارتفاع متأخر في السكر.

📌 عشان كده السكر ممكن يعلي بعد ساعات من الوجبة وماتبقاش عارف السبب ولكن السبب هو الدهون الكتير في الوجبة
وده بيحصل كتير مع:
🍖 الضاني
🍲 الفتة
🥐 الرقاق
🥩 الأكلات الدسمة في العيد
طب نعمل اه ماناكلش فتة ؟ لا طبعا هاناكل ولكن ☝️
إزاي تتجنب ارتفاع السكر بعد الفتة؟

✅أشرب قبل الاكل كوب ماء و عليه شريحه من الليمون🍋‍🟩

✅ ابدأ اللحم وسلطة عليها عثرة ليمون و ليس الارز.

✅ قلل الدهون الزائدة والسمنة
كل ما الدهون زادت… الارتفاع المتأخر زاد.

✅ خليك معتدل في كمية الرز والعيش والرقاق
لأن الكارب هنا “مضاعف”.

✅ الحركة الخفيفة بعد الأكل 10–15 دقيقة
بتساعد الجسم يستخدم الجلوكوز بشكل أفضل.

طيب مريض السكر اللي بياخد إنسولين يعمل إيه؟ 💉

📌 الأكلات اللي فيها:
كارب + دهون + بروتين
ممكن تحتاج طريقة مختلفة للحساب.

لأن:

السكر أحيانًا:
⬆️ يعلى بسرعة من الكارب
ثم
⬆️ يعلى تاني بعد ساعات بسبب الدهون والبروتين

✍️هنا بعض المرضى قد يحتاجوا تقسيم الجرعة الأنسولين الماءي ازاي 😇

يعني نقسم الجرعة بتاعتنا ناخد نص الجرعة مع الوجبة وباقي الجرعة بعد الوجبة بساعتين او تلات ساعات مع قياس السكر قبل الوجبة وبعد الوجبة بساعتين قبل ماتاخد باقي الجرعة
وطبعا لو قست بعد ساعتين ولقيت سكرك مظبوط ماتقولش خلاص مش هاخد باقي الجرعة لا لازم ناخودها لأن السكر هاي علي بعدين

⚠️ وده طبعا لمستخدمي السرنجات أو الأقلام او المضخة


دمتم بصحة وعافية وعيدكم سعيد

أماكن حقن الإنسولين الأساسية حسب توصيات American Diabetes Association هي:
البطن
🎤الجزء الخارجي من الذراع
🎤الجزء الأمامي/الخارجي من الفخذ
🎤أعلى المؤخرة أو أسفل الظهر
🎤وده ترتيب سرعة الامتصاص غالبًا:
البطن → الأسرع والأكثر ثباتًا
الذراع
الفخذ
المؤخرة → الأبطأ
🎤أهم نقطة فعلًا: التدوير وتجنب التليف
👎الحقن المتكرر في نفس النقطة يعمل:
تليف/تحجر تحت الجلد (Lipohypertrophy)
امتصاص غير متوقع
مرات الإنسولين يشتغل ببطء جدًا أو فجأة بسرعة
تذبذب كبير في السكر
👍ولو في مكان “ناشف” أو “مكور” أو أقل إحساسًا بالألم، غالبًا ده تليف ومفروض تبعد عنه أسابيع إلى شهور.
💪إزاي تدوّر صح؟
بدل ما تحقن في نفس النقطة:
استخدم نفس المنطقة لوقت الوجبة لو بتحب الثبات (مثلاً الفطار دائمًا بطن)
لكن غيّر النقطة نفسها كل مرة بمسافة 1–2 سم
قسم البطن لمربعات أو دوائر ولف بينهم
أسرع أماكن الامتصاص
✍️ لو بتستخدم إنسولين سريع قبل الأكل:
البطن أفضل اختيار غالبًا
خصوصًا بعيد 2–3 صوابع عن السرة
🏃 الرياضة كمان تزود الامتصاص:
حقنة في الفخذ قبل الجري = امتصاص أسرع واحتمال هبوط أعلى
حقنة في الذراع قبل تمرين upper body نفس الفكرة
بخصوص التليف
🤕المكان المتليف ممكن:
يوم يديك مقاومة وارتفاع
ويوم الإنسولين يتجمع وينزل السكر متأخر
👀عشان كده لو عندك قراءات “غريبة” رغم نفس الأكل والجرعة، افحص أماكن الحقن أول حاجة.
☝️وتوصيات ADA كمان تشدد على:
تغيير سن الإبرة كل مرة
عدم إعادة استخدام الإبر كثيرًا
فحص أماكن الحقن باستمرا

هبوط السكر؟ اتصرف صح بقاعدة 15-15

لو السكر أقل من 70 mg/dL
ما تقوليش يا ماما انا هافطره او هاغديه دلوقتي وماياخودش حقنته ده تصرف غلط خالص
اومال نعمل اه

✅ نتبع قاعدة 15-15

✔️ ناخد 15 جرام كارب سريع الامتصاص
ثم نستنى 15 دقيقة (ربع ساعة)
وبعدين نقيس السكر تاني.

🍯 15 جرام كارب = هاناخد واحد فقط من دول:

🥤 نص كوب عصير
🍯 معلقة سكر كبيرة علي ربع كوب ماء
🧃 نصف علبة عصير صغيرة
🍓معلقة مربي كبيرة

⛔️ مهم جدًا:
ما تاخدش شوكولاتة أو أكل دهني وقت الهبوط
لأن الدهون بتبطّأ امتصاص السكر.

📌 بعد 15 دقيقة:
✔️ قيس السكر تاني

لو لسه أقل من 70
🔁 كرر نفس الخطوات مرة تانية.

🚨 طب لو السكر أقل من 54 ؟!

هنا الهبوط يعتبر أشد
⚠️ فنحتاج 30 جرام كارب سريع الامتصاص بدل 15

يعني ممكن:
🥤 كوب عصير كامل
أو
🍯 2 معلقة سكر علي نص كوب ماء
أو
🍓معلقتين مربي

ثم نستنى 15 دقيقة
ونقيس السكر تاني.

✅ لو السكر رجع طبيعي
(يعني بقى فوق 100 تقريبًا)

لازم نثبت السكر عشان ما يهبطش تاني 👇

ناخد نشويات معقدة + بروتين مثل:

🥖 ربع رغيف + جبنة
🥛 كوب لبن
🥣 علبة زبادي + 3 ملاعق شوفان

وده مهم جدًا عشان:
✔️ نمنع الهبوط يرجع تاني
✔️ نقلل شراهة الجوع بعد الهبوط

⚠️ ولو الهبوط شديد جدًا
أو الشخص فاقد الوعي
⛔️ ممنوع نحاول نديله أكل أو شرب بالفم
ولازم تدخل طبي فورًا.

ولو حقنة الجلوكاجون متوفرة
💉 ممكن تُستخدم لإنقاذ الحالة لحين الوصول للمستشفى أو الإسعاف