Salwa Salah سلوى صلاح

الدم ده يا ابني فيه كرات دم بيضا وحمرا وبونبوني بصوت فتحي عبد الوهاب 😍
كفايه بقي حلويات🍬🍭 وانت يا كبير كفايه نسكافيه ☕دمك بيشتكي وانا سامعاه من عندي

بس صحيح هو الدم فيه كور ؟ يعني فيه ماتشات كوره واجوان واستاد وضربات جزاء ؟ وياتري بقي اهلاوي ولا زملكاوي هيهيهييهي وبرشلونه ولا ريال 🤔

دمك مش خفيف كفايه الش 😏😏

ايوة
الدم فيه كور
وللاسف تقريبا كده فيه اهلي وزمالك بس بيلعبو مع بعض مش ضد بعض ومحدش يزعل مننا وعددهم مش اد بعض

الفريق الاول :الفريق الاحمر - واسمها كور الدم الحمرا : ( مش الاهلي خالص 🚩 )

كتير اوي وصغيره ولونها احمر بجد مش بهزر ، فيها ماده لونها احمر ودي مش موجوده منها كفايه عند بنت خالتك الضعفانه اللي مقضياها اندومي اسمها هيموجلوبين Hb وده طبعا اسم الحاجه اللي بتديها اللون الاحمر و مش اسم بنت خالتك يا نبيهة 😁
الكور دي متقدرش تستغني عنها لحظه واحده في حياتك
ولو قلت تتعب اوي ، ربنا يكتر كورونا الحمرا يارب امين
ولو فيه عمليه أو حادثه وقلت الكور الحمرا بنجري ونعمل نقل دم عشان نزودها تاني 🤕

الفريق التاني : الفريق الابيض 🏳️ ( اكيد مش الزمالك يعني ) : واسمها كرات الدم البيضا

ودي كبيره وقليلة ولونها ابيض فعلا شفاف ودي بقي مش محتاجها كل ثانيه زي الكور الحمرا , لكن لو استفرد بيك دور برد وهي مش هنا 🤧🤧😷, روحت فداهيه راحت حياتك يا عبصمد
فنحترمها واحنا بنتكلم عليها , لها اشكال كتير عكس الكور الحمرا الي ليها شكل واحد بس

وكفايه كده عليك النهارده
الكرات الحمرا : red blood cells ( RBCs)
الكرات البيضا : white blood cells ( WBCs )
اللون الاحمر : Hemoglobin (Hb )
والدم : blood

لو عايزه تعرفي بنت خالتك هبطانه ليه - وانت عايز تقول لباباك يبطل سجاير ليه
تابعوني وهقولكم تقولوهم ايه

روحو بصو يلا علي صوره كارتونيه للفريقين وصوره للدم تحت الميكرسكوب 🔬 وصوره تالته للقمر اللي عملت البوست صاحبة اخف دم
وانت بقي ، مبدأيا كده بتشجع مين ؟ الكور الحمرا ولا البيضا ؟
Salwa Salah

"لو فاكر إن الكربون كله واحد... اسمحلي أقولك لأ! الكربون عنده شخصيات مختلفة، زي ما عندك قرايب كل واحد فيهم دماغه مختلفة!

الكربون-12: الرايق بتاع العيلة، عايش حياته طبيعي جدًا، ومش مهتم يزعج حد.

الكربون-13: اللي دايمًا يقولك: أنا مختلف! بيحب يدرس تركيب الحياة عشان يثبت أهميته.

الكربون-14: المشاغب! مش بس مشع، ده كمان بيستخدموه في التأريخ وكشف أسرار الحفريات.

Salwa Salah
📞 01040837935
"

حرك اديك في الميه ، وحركها في الهوا ، مين اسهل واسرع ؟ الهوا اسرع ،، بنتحرك في الهوا افضل

طب وانت ماشي بالعربية بسرعه علي طريق اسفلت وفجأه لقيت رمل ، مش العربيه بتحود منك شويه اول متسيب الاسفلت وتخش عالرمل ؟ وتبدأ تمشي فلرمل بطيء بعد كده

يبقي نفهم من كده اننا لما نغير سرعتنا فجأه ، هنغير اتجاهنا علطول ، بنمشي في الاسفلت اسرع من الرمل ، فلما نغير من اسفلت للرمل هنحود علطول .. وده اللي الضوء بيعمله لما بيتنقل من الهوا للميه او للازاز ،،، او العكس ،، سرعته بتتغير فبيحود في ظاهره لطيفه اسمها انكسار الضوء او ال ( light refraction )

طب نشوف الظاهره دي فين وايه اهميتها؟
نشوفها في العدسات جوا الميكرسكوب ، او التلسكوب اللي بيصور الفضا ،، زي مثلا اخر تلسكوب طلعته امريكا واعلن الرئيس الامريكي بايدن بنفسه عن اول صوره ملونة بعتها التلسكوب ده من حوالي اسبوعين واسمه تلسكوب جيمس ويب : (James Webb Space Telescope)

طب عرفنا ، يغير سرعته ، بعدها يغير اتجاهة ،، لكن من الاساس ليه الضوء سرعته مختلفه في الميه عن الهوا عن الازاز.. ؟ ليه بيمشي في الهوا اسرع ؟

بص يا سيدي ، السرعة بتتحدد علي حسب كثافة (density) المكان اللي الضوء ماشي فيه
يعني المكان لو كثيف ( زحمه وفيه جزيئات كتير) الضوء يمشي ببطء لو كثافته قليله ، يجري بسرعه علطول

انت لو ماشي وسط اتوبيس زحمه هتمشي اسرع ولا ابطأ من لما تمشي في مترو مصر الجديده وهو فاضي 😁 اكيدفي الفاضي تمشي اسرع عشان كده الضوء بيمشي اسرع في الهوا عن الميه او الازاز ، لان الهوا فاضي اكتر (كثافته اقل)
(less density)

، يفضل الضوء ماشي رهوان قبل ما يخش العدسه وفجأه يغير الوسط اللي ماشي فيه ويلاقي قدامه زحمه الازاز فيغير سرعته طبعا ،، وبعدها اتجاهه وينكسر ( light refraction )

ما عن تفصيلة الفرق بين العدستين اللي في الصوره ، نقولها مره تانيه ،، بس عايزاك تشوف شعاع الضوء وهو بيغير اتجاهه من الطريق الدوغري ، ويروح تحت او فوق

عرفت ايه سبب انكسار الضوء ؟

اللي قدامك فلصورة دي ضفدعة
اه والله ، وهي صغيره بتكون سمكة وبتتنفس ب gills عادي ، وفجأة تخش في تغيرات ، وتتنقل بعدها للحياة عالارض ، وتتحول للضفدعه اللي متعودين عليها وبنشوفها دايما وتتنفس ال oxygen من الهوا بال lungs عادي .. ركزو معاها لاننا هيجي وقت ونتكلم عنها بعدين

مينفعش تبقي كبير كده وقمر ، ومش عارف الفرق بين ال metal وال non metal

انا عارفه انك عارف استخدامهم في حياتك ، لكن ممكن متكنش عارف اسمهم العلمي

ال( metal )هم المعادن ، حديد ونحاس ودهب وبتاع ودول تحطهم في الفيشه يكهربوك ، تلمسهم بعد دقيقه من ما تحطهم عالنار ،، يلسعوك ،، مؤذيين احيانا لما تتعلق بسلامتك ، لكن هم بيقضولك مصلحتك ، تعمل منهم سلك كهربا تمشي في الالكترونات ، حلة تطبخ فيها البامية ،، كده

ال (non metal ) العكس ، امان عالي جدا بس مينجزوش مصلحة كهربا ولا سخونية ، زي البلاستك اللي بنمسك منه الحله السخنه لما نشيلها من البوتجاز للترابيزه بتاعه المطبخ ، مبيبقاش سخن ، بالرغم ان الحله نفسها المونيا او استنلس بتكون مولعه ،، البلاستك بيوقف الحراره ،، والكهربا كمان بالمناسبه ، تمسك السلك العريان ( اللي منغير بلاستك) تتكهرب وتسلم عالشهدا ،، تمسك السلك العادي الملفوف ببلاستك ولا يحصلك حاجة وعشان كده بنمسيه( insulator ) عازل يعني

طب ايه الفرق بينهم في تركيب الكيميائي ال (atoms) بيخليهم مختلفين اوي كده في السلوك

خلينا نبدأ بالكهربا ، طبعا انت عارف يا حلو ان الكهربا عباره عن الكترونات بتجري ورا بعضها في السلك ،،
ال metal بيكون عنده الكترونين تلاته في اخر level او طبقه اخرك تمانيه ( ارجع لبوست تركيب الذره هحطه في اول كومنت) دول مبيبقوش محبوبين اوي من الذرة فاول ما الالكترون ده بيشوف الكترون غريب بتاع كهربا جي من بعيد بيجري من ذرته وبيته ويروح يوصله للي بعده .. وهو الكترون الكهربا مش عارف يعني يمشي لوحدخ في السلك ؟
اه مش عارف ،، محتاج اللي يساعده.. وال Metal outermost shell electrons خير من يساعد 😁 مصدقت اصلا
لكن ,non metal زي البلاستك بتاع ال safety ده ،، الكترونات اخر مستوي بتكون كتير فوق الاربعه خمسه سته سابعه ،، بس علي اد مهم كتير علي اد ما بينها وبين الnucleus بيكون فيه ترابط ،، ترابط اسري 😂 بتبقي قافشه في الذره ، الموجب جوا (nucleus ) بيكون زاد ، وقلبها قوي ، وبتقفش بقي في الكترونات اخر مستوي وتشدها جامد ،، وممنوع تخرج وتسيب البيت لاي ظرف من الظروف 😀 فيفضل الكترون الكهربا دايما واقف عالباب مستني اللي ينقله ، ومش لاقي حد
شديده اوي مع الكترونات اخر مستوي ( outermost shell )بتاعتها

وبالمناسبه قفشه الprotons ال positive للاكترونات ال negative اللي موجوده في اخر مستوي ، لها مصطلح لطيف اسمه electronegativity
وده بيبقي مفتاح لتفاعلات كيميائيه كتير ولسلوك كتير للذرات جوا ال (compound ) هنتكلم عنه بالتفصيل في مره تانيه

ايمانك بنفسك هو اول الطريق

البيت بيت ابونا والغرب يفرقعونا
من الحاجات الغريبه اللي مش لطيفة اللي الفيرس بيعملها لما بيخش الجسم ، انه بعد ما بيخش الخلية (cell) بيجبرها تخلية يخلف ( الفيرس مفهوش راجل وست طبعا ، بس تخلف هنا معناها تزيد في العدد) ، يفضل يزود عدد الفيروسات لحد ما الخليه متبقاش سايعاهم ، وتفرقع من كتر زحمه الفيروسات اللي جواها ، وطبعا بتبوظ ، وينطلق الفيرس علي باقي خلايا الجسم يكرر معاها نفس اللي عمله مع اللي قبلها

ازاي بقي بيجبرها وازاي الخليه (cell ) بتسمحله يخش جواها اصلا ؟ واحنا هنتصرف ازاي معاه مهو احنا كمان مش قليلين فلمكان 😁 ،، كل ده هنتكلم عنه في بوستات تانيه عن
و ال
الفيرس اكبر مثال علي انها مش بالحجم ، لكنه مهما عمل هيفضل اسمه فيرس وسمعته وحشه عند الانسان 😁 ومسأله وقت علي ما الجسم بيكشفه ويطرده ويتحفر في ذاكرته للابد عشان ميضيعش وقت المره الجايه تاني لو جاله نفس الفيرس ده تاني، ويبدأ يشتغل ضده علطول قبل ما يفجرله خليتين تلاته ، فلو سمحت استخدم مهارتك وزكائك في الخير مش في الشر ، خليك انسان مش virus

كتير جدا احنا اللي بننتصر ونغلبه في الاخر زي اي فيلم عربي قديم 😁 لان احنا كمان لينا تكنيكات وجيش كبير بيدافع عننا ،، وده سبب من اسباب استمرار جنسنا البشري

مش هطول عليكم ، نتقابل في بوست تاني تكمله للفيرس