屯門畫室 Tuenmunstudio.com

比到感覺嘅模特兒，可遇不可求。感謝遇上。

將筆觸減到最少

繼續外母系列，跟住將室內燈光關掉，完全倚賴自然光，對比強烈，加強筆觸嘅力量。老人家面部充滿變化。越來越開心。

直播開始
https://www.youtube.com/live/tAu-6-mM9O8?si=3k1hL_q5I05DdwbW

久違直播，今晚大家多多捧場。

外母帶咗一副又厚又大嘅老花眼鏡，喺反光同埋折射下，會演出迷惘嘅神情，加上個嘴又張開，非常可愛。

每逢星期一，外母都會有一段時間獨留家中，我就會走上去畫佢，有腦退化，每次都要安安靜靜地坐着。

師兄嘅學生及朋友展覽完美結束。係我參加過最重要嘅畫展，沒有之一。
10幾20個同學朋友，齊心協力喺極速（兩、三個星期）嘅時間完成畫展，我諗全世界只有香港人做得到。
成個流程跟足程序，每個嘉賓所講嘅致辭都係同師兄嘅生活點滴，真誠，沒有半點誇大造作。
以下係我用文字嘅記錄，嗰日我所講嘅致辭，同大家分享。
我認為師兄嘅藝術，可以用兩個字形容，凶猛、唔舒服。
凶猛係佢用來形容犀利出色超卓嘅意思，追求嘅藝術係要達的層次。而唔舒服就係佢嘅創作方式。有意無意，佢專將自己擺喺呢個唔舒服嘅位置。
九七年，我哋參加中大校外山水入門，中國畫要一張羊毛氈同埋好多紙筆墨硯，set up好煩，師兄住喺新翠邨，細細嘅單位裏面佢有一張好大嘅畫枱，自己就係枱底瞓覺，我學咗佢去宜家買咗一張大枱，我同細佬瞓一間房。將碌架床下格拆破，擺畫枱然後喺枱下便瞓覺，第二朝起身背脊痛到不得了，打電話向佢投訴，佢答我，我都冇話過係舒服。
第二個唔舒服係佢畫咗幾年中國畫之後，老師勸佢唔好畫中國畫，只係練習書法，佢好憤怒，更加努力用書法喺中國畫上面，佢係刻意令自己嘅唔舒服。
最後係啱啱上年我睇到佢嘅師生畫展，見到佢啲學生畫得不錯，問佢會唔會花咗太多時間教學，自己冇時間畫畫，佢同我講，只要學生畫得凶猛，觀眾會知道係師兄教出來，咁即係佢都凶猛。
我希望師兄的學生之後繼續努力，令觀眾們知道佢哋係由一個兇猛嘅師兄教出來的，多謝各位。

全部過程來得好快，由師兄入院到過身，一個月一個禮拜多。好似過借三、四個月。
可能之間要處理事情好多。來不及處理自己嘅情緒。而家過咗個禮拜，覺得成個世界靜咗好多，無人同我每朝起身廢噏個幾鐘、無人同我分享藝術喜悅/失落(我哋畫傳統藝術，習慣失敗)。有畫畫嘅朋友就會明，生命中只有極少數嘅朋友可以分享到藝術的微妙之處。當我畫到幾筆我想追求嘅效果，我就會馬上影低分享俾師兄，唔理佢明唔明，講一大堆自己嘅感受，我知道佢畫中畫，有時候唔係完全明白，不過佢會完全接納我嘅感受，佢最後比我素描嘅評價係:(而家咪畫得幾好，以前要累(用)好多筆，而家三、四筆就得啦，記住得閒畫多啲。)
佢嘅一班學生同畫友組成一個WhatsApp群組，互相講師兄生前趣事，慢慢組合成為更加完整嘅圖像。有時悲傷，但係更加懷念相處時候嘅溫馨。佢喺我哋一班親朋戚友之間留下極大量嘅懷念，一直都係畫佢想畫嘅畫，真係不枉此生。
嚟緊4月11日至4月12日，12時至七時，喺中環嘉軒廣場2樓潮廳舉行李振華與學生藝友們畫展。4月11日下午二時開幕。大家嚟欣賞師兄嘅藝術。
ps 我都會參加。

師兄，約好咗下世再一齊畫。呢一次你可以試吓畫西畫啦。

因為想用同一個高度繪畫，因此站了起來。模特兒身體比例修長，強調線條變化。面部嘅輪廓線條減少，強調高光，花餘下來的時間在暗面、頸嘅變化，同埋頭髮。