Bil-Qari u l-Kitba Niskorja/Footballers Read and Write Programme

‘Bil-Qari u l-Kitba Niskorja’ huwa programm ta’ futbol u litteriżmu offrut għall-istudenti li qegħdin fir-raba’ u l-ħames sena tal-iskejjel primarji tal-istat. L-għan tal-programm huwa li juża l-passjoni u l-entużjażmu tat-tfal għall-futbol biex iħeġġeġ fihom l-imħabba għall-qari u l-kitba. B’mod partikolari, il-programm ser jattira subien li ma tantx iħobbu jaqraw u jiktbu bil-Malti u bl-Ingliż f’dan il-livell. Coaches professjonali u edukaturi tal-litteriżmu ser ikunu preżenti fl-iskejjel tal-istat biex jippromwovu l-qari u l-kitba permezz tal-attività fiżika, u l-logħba tal-futbol. L-adulti li ser ikunu parti minn dan il-programm ser ikunu qed jikkontribwixxu lejn ix-xogħol siewi li diġà qed isir fl-iskejjel biex is-subien u l-bniet kollha jkunu ta’ suċċess kemm fil-qari kif ukoll fil-kitba. Il-Programm ‘Bil-Qari u l-Kitba Niskorja’ tnebbaħ mill-‘Premier League Reading Stars’ (PLRS) tal-Ingilterra li huwa mmexxi minn National Literacy Trust, il-Premier League u l-British Council. F’pajjiżna l-programm se jkun qiegħed isir bl-appoġġ tal-Malta Football Association (MFA) u Sport Malta.