Osman Tamraby

مكالمه مع صديقي المجكت:
يازول ماتقول لي مواطنين وبتاع
🤣🤣طارق اللمين🤣🤣
-- الو... أمير.. كيفك انت في الخرطوم لسه وفي الحله كمان والله ماشالله
-- اهلا بيك حبابك والله اي في المرطوخ وفي اللحه زاتا... مجكتين ومصنددين مامرقنا اصلو... نحن تمام ميه ميه... كيفكم انتو؟
--الحمد لله.. شايف في السوشيال ميديا قالو المواطنين مارجعو البلد ولسه حردانيين.. صحي؟
-- منو ديل؟ مواطنين؟
يازول مالك علينا؟ مواطنين لي شنو كمان... البلد دي ياخوي ظريفه كده ودسيسه للميتين
ماتقول لي مواطنين وبتاع.. الله لا عادهم ياخ...
--- يارجل؟ كيف الكلام دا؟ مافاهمك
--ياقرييك افهمك.. البلد دي يادووبك كده ظبطت أمورنا باسطه.. مافي شكله مافي زعل مافي قوالات... السمك تلاته كيلو بي بحه(الف جنيه)
والناس حنان ولذيذين ياكلو سوا وينومو سوا
مافي سوليب(بوليس) مافي قاضي مافي نيابه مافي محامي ونقه.. ماإحتجنا ليهم زاتو
اتضح انو كان في وهمه كبيره وناس كتار مامحتاجين ليهم ومافي داعي ليهم اساسا
--يازول كيف الكلام دا؟
-- زي ماقت ليك.. اكون معاك واضح... البلد دي اصلا مشكلتا كانت ياهو المواطنين ديل... اختفو طوالي المشاكل اختفت
--لكن المواطنين ديل مهمين.. المواطنه...اساس الحقوق ياخي
---ياعمك انساني
من الحنك البييش دا...
المواطنه دي اساس العقوق انا والله كلمة مواطنين دي براها بقت تلبشني.. بلد ظابطه تعمل اي حاجه دايرا تحوم بي حمالات.. تكورك... تعمل الدايرو زول بسالك مافي.. زمان نحن ياخ عشان تسف ساي تمرق بره الحله
__ اها كان جاك بوليس كيف؟
--سوليب منو ياعمك..مافي سوليب اها قول جاك.. يوديك وين.. قت ليك قاضي زاتو مافي.. ومافي زول فاضي للفارغات
الكهربا زاتا مادايرنها عشان ماتجيب لينا المواطنين واللبش واللجان الشعبيه وباقي الطعميه
هو المواطنين بعملو شنو.. غير يقول ليك لجنة الظواهر السالبه وتنسيقية شنو وشنو داك... كلهم عاملين فيها ملايكه وحكومه.. انسي الحنك دا ياعمك
و البلد دي كده ميه ميه لو مامصدق تعال براك عشان تقتنع ياخي حريه سلام وعداله واي حاجه بس انت زول إعلامي اكتب الحنك دا قصة مواطنين دي حنك بيش مفروض الناس تكافح القصه دي.. انا لو محل الحكومه بعمل عديل (نيابة مكافحة المواطنين) ياخي البلد دي لو جو فيها مواطنين بتبوظ تاني.. كلمتك وانا غايتو مابتنفع معاي... الله معاك يامان