رویاخصوصي عالي لېسه

د رویا خصوصي عالي لېسې د کلنیو ازموینو بهیر په بریالیتوب سره روان دی
نن سه‌شنبه، د ۱۴۰۵ کال د غبرګولي ۱۲مه، د رویا خصوصي عالي لېسې د کلنیو ازموینو لړۍ په منظم، ارام او مناسب تعلیمي چاپېریال کې دوام لري.
زده کوونکي د ښه چمتووالي او بشپړ نظم په فضا کې خپلې ازموینې ترسره کوي او د خپل یو کلن علمي زحمت ارزونه کوي. د ازموینو بهیر د ټاکل شوي مهالویش او اصولو له مخې په شفاف او منظم ډول پر مخ روان دی.
د رویا خصوصي عالي لېسې اداره ټولو زده کوونکو ته د لا زیاتو بریاوو، غوره پایلو او روښانه راتلونکي هیله لري.

نن دوشنبه، د ۱۴۰۵ کال د غبرګولي (جوزا) ۱١مه، د رویا خصوصي عالي لېسې د ۱۴۰۵ تعلیمي کال کلنۍ ازموینې په منظم او ارام چاپېریال کې روانې دي.
زده کوونکي د بشپړ نظم او چمتووالي سره په ازموینو کې ګډون کوي او د کال په اوږدو کې خپلې زده کړې او لاسته راوړنې ارزوي. د ازموینو بهیر د ټاکل شوي مهالویش له مخې په شفاف ډول پر مخ وړل کېږي.
د رویا خصوصي عالي لېسې اداره ټولو زده کوونکو ته د بریالیتوب او غوره پایلو هیله کوي.

د رویا خصوصي عالي لېسې د ۱۴۰۵ تعلیمي کال کلنۍ ازموینې پیل شوې
د رویا خصوصي عالي لېسې د ۱۴۰۵ تعلیمي کال کلنۍ ازموینې په رسمي ډول پیل شوې. د ازموینو د پیل په مناسبت د لېسې عمومي مدیر انجنیر عمر کوټوال زده کوونکو ته د بریالیتوب هیله وکړه او هغوی یې وهڅول چې په اعتماد، نظم او پوره چمتووالي سره ازموینې ترسره کړي.
ښاغلي کوټوال وویل چې ازموینې د زده کوونکو د زده کړو د کچې د معلومولو غوره فرصت دی او هر زده کوونکی باید د خپل کال ټولې لاسته راوړنې پکې وښيي.
د لېسې ادارې د ازموینو د منظم او شفاف ترسره کېدو لپاره اړین تدابیر نیولي دي او ټولو زده کوونکو ته د بریا هیله لري.

د رویا خصوصي عالي لېسې قدرمنو زده کوونکو!
السلام علیکم ورحمة الله وبرکاته
هیله ده چې د اختر مبارکې ورځې مو په خوشحالۍ او نېکمرغۍ سره تېرې کړې وي.
ټولو زده کوونکو ته خبر ورکول کېږي چې د کلنیو ازموینو لړۍ د جوزا میاشتې په ۱۰مه نېټه د سهار په ۷:۰۰ بجو پیلېږي. له همدې امله، زده کوونکي دې د ټاکل شوي مهالویش له مخې پر وخت ښوونځي ته حاضر شي او په منظم ډول په خپلو ازموینو کې ګډون وکړي.
ستاسو د بریالیتوب او روښانه راتلونکي په هیله.
په درنښت
د رویا خصوصي عالي لېسې اداره

د نېکمرغه لوی اختر د مبارکۍ پېغام!
بسم الله الرحمن الرحيم
د رویا خصوصي عالي لېسې قدرمنو استادانو، محترمو والدینو، ګرانو زده‌کوونکو، د پوهنې درنو ملاتړو او د هېواد ټولو مسلمانانو وروڼو او خویندو ته!
السلام علیکم ورحمة الله وبرکاته
د نېکمرغه لوی اختر د مبارکو ورځو په مناسبت تاسو ټولو ته د زړه له کومې مبارکي وړاندې کوم. الله تعالی دې دا سپېڅلې ورځې زموږ لپاره د رحمت، برکت، خوښۍ او یووالي سبب وګرځوي.
لوی اختر یوازې د خوشحالۍ ورځ نه ده، بلکې د قربانۍ، اخلاص، ورورولۍ او انسانیت ستر درس هم راکوي. دا مبارکې ورځې موږ ته د مینې، بښنې او یو بل ته د خدمت پیغام راکوي، ترڅو د یو سوکاله، باعلمه او متحد افغانستان لپاره ګډ کار وکړو.
رویا خصوصي عالي لېسه د علم، اخلاقو او سالمې روزنې مرکز په توګه تل هڅه کوي چې خپلو زده‌کوونکو ته د عصري تعلیم ترڅنګ د اسلامي او انساني ارزښتونو رڼا هم ورسوي، ترڅو راتلونکی نسل د هېواد د پرمختګ او ابادۍ لپاره اغېزمن رول ولوبوي.
له لوی څښتن څخه هیله کوم چې زموږ هېواد ته تلپاتې سوله، ثبات او سوکالي په نصیب کړي، او زموږ ځوانان د علم او بریا لوړو پوړیو ته ورسوي.
ستاسو د خوشحاله، امن او برکت ډک اختر په هیله.
اختر مو مبارک!
ضیاءالحق مومندزی
د رویا خصوصي عالي لېسې مؤسس

په رویا خصوصي عالي لیسه کې د دولسم ټولګي وروستۍ اسمبلي په داسې احساساتي فضا کې ترسره شوه، چې د هر زده‌کوونکي خبرې د حاضرینو زړونه لړزول.

زده‌کوونکو د ښوونځي د کلونو یادونه، د استادانو مینه، د ملګرو خوږې خاطرې او د رخصتۍ سخت احساس په ډېرو اغېزمنو الفاظو بیان کړل. د هرې وینا پر مهال د زده‌کوونکو او استادانو له سترګو اوښکې روانې وې او فضا د احساساتو ډکه شوې وه.

یاده اسمبلي د زده‌کوونکو د شخصیت، استعداد او ښې روزنې ښکاره بېلګه وه او د ښوونځي له چاپېریال سره یې د هغوی ژوره مینه او تړاو څرګنداوه.
رویاخصوصي عالي لېسه

د ۱۴۰۵ تعلیمي کال د کلنیو ازموینو د نهایي چمتووالي، منظم تطبیق او د ازموینو د بهیر د لا ښه مدیریت په موخه، د تدریسي او اداري پرسونل ګډه عمومي ناسته د آمر انجنیر صاحب عمر کوټوال په مشرۍ ترسره شوه.
یاده ناسته د قرآن عظیم الشان په مبارک تلاوت پیل شوه، ورپسې آمر انجنیر صاحب عمر کوټوال ګډونوالو ته د کلنیو ازموینو اړوند لازمې لارښوونې وړاندې کړې. نوموړي د ازموینو د بهیر پر شفافیت، نظم، د وخت پر مراعات، د امتحاني صحنو پر دقیق کنټرول او د پوهنې ریاست د منظور شویو اصولو او لوایحو پر بشپړ تطبیق ځانګړی ټینګار وکړ.
په ناسته کې د زده‌کوونکو د عادلانه ارزونې، د مسؤلیتونو د دقیق ترسره کېدو او د ازموینو د بهیر د اغېزمن مدیریت په اړه هر اړخیز بحث وشو او ګډونوالو ته لازمې سپارښتنې وړاندې شوې.
همداراز، انجنیر صاحب عمر کوټوال د تدریسي او اداري پرسونل له دوامداره همکاریو او ژمنتیا څخه مننه وکړه او ویې ویل چې د ښوونځي د تعلیمي معیار لوړوالی د نظم، شفافیت او ګډ مسؤلیت پایله ده.
د غونډې په پای کې ټولو ګډونوالو خپله بشپړه ژمنتیا څرګنده کړه چې کلنۍ ازموینې به د منظور شوې طرحې او اداري لارښوونو مطابق، په بشپړ شفافیت، نظم او عدالت سره ترسره کړي.
نشراتو او عامه اړیکو مدیریت
۱۴۰۵/۲/٣٠

نن ورځ په رویا خصوصي ښوونځی کې د کلنۍ ازموینو بهیر د غوره نظم، شفافیت او مسؤلیت احساس په فضا کې په بریالیتوب سره جریان لري. د ادارې محترمو غړو او قدرمنو ښوونکو د ازموینو د معیاري او منظم تطبیق لپاره لازمې هڅې ترسره کړې دي، او زده‌کوونکي هم خپلې ازموینې په جديت او اطمینان سره پر مخ وړي.
موږ د ښوونځي د ټولو کارکوونکو، ښوونکو او زده‌کوونکو له همکارۍ او هڅو څخه مننه کوو، او خپلو ګرانو زده‌کوونکو ته د لا ډېرو علمي بریاوو او روښانه راتلونکي هیله لرو.
رویاخصوصي عالي لېسه

د ویاړ او هڅونې شېبې
الحمدلله، د PTM ازموینې هغه غوره، مخکښ او ځلانده زده کوونکي چې په خپلو هڅو، زحمتونو او غوره لاسته راوړنو یې ممتازې پایلې ترلاسه کړې وې، د ښوونځي د ادارې له لوري په ځانګړو ډالیو او ستاینلیکونو ونازول شول.
موږ باور لرو چې تشویق او قدرداني د زده کوونکو د لا پرمختګ، اعتماد او روښانه راتلونکي لپاره مهم رول لري.
هیله ده زموږ نور زده کوونکي هم د علم، اخلاقو او بریاوو په ډګر کې لا زیاتې هڅې وکړي.
په پای کې د ټولو قدرمنو استادانو او والدینو څخه مننه کوو چې د خپلو اولادونو د بریا لپاره نه ستړې کېدونکې هڅې کوي.
رویاخصوصي عالي لېسه