YJET

Një nga momentet më të veçanta dhe më emocionuese të kësaj dite ishte ceremonia e diplomimit dhe ndarja e certifikatave, si dëshmi e mbylljes me sukses të një viti të mbushur me punë, përkushtim dhe arritje.
Çdo nxënës u vlerësua për përpjekjet, progresin dhe kontributin e tij gjatë vitit shkollor, duke marrë me krenari certifikatën që simbolizon rrugëtimin e tij drejt dijes dhe zhvillimit personal.
Emocione të veçanta sollën edhe fjalët e ngrohta dhe vlerësimet e prindërve, të cilët shprehën mirënjohjen dhe mbështetjen e tyre për punën e përbashkët gjatë këtij rrugëtimi.
Po aq prekës ishte edhe momenti i dhënies së vlerësimit nga dy studentet, Elena Bego dhe Grejsi Ustalli, kandidate për mësuese, të cilat zhvilluan praktikën profesionale në klasën tonë. Me përkushtimin, energjinë dhe dashurinë e tyre për fëmijët, ato u bënë pjesë e pandashme e përditshmërisë sonë dhe lanë kujtime të bukura tek nxënësit.
Kjo ceremoni nuk ishte vetëm një ndarje certifikatash, por një festë e suksesit, bashkëpunimit dhe kujtimeve të bukura që do të mbeten gjatë në zemrat tona.

Prezantimi i Projektit Vjetor Ndërlëndor
Gjatë aktivitetit përmbyllës u prezantua puna e një viti të tërë, e mbushur me përpjekje, përkushtim, bashkëpunim dhe dëshirë për dijen, krijimtarinë dhe të bukurën.
Projekti ynë vjetor ndërlëndor “Miqtë e Mjedisit” ishte një shembull i mësimit nëpërmjet veprimit, ku nxënësit jo vetëm mësuan, por edhe kontribuan konkretisht për komunitetin dhe mjedisin. Ai u ndërtua mbi idenë se projektet më të suksesshme janë ato që janë të prekshme, të zbatueshme dhe që sjellin ndryshim të vërtetë përmes produkteve dhe rezultateve të tyre.
Si produkt përfundimtar, nxënësit krijuan Revistën Mjedisore, e cila përmbledh aktivitetet, përvojat, hulumtimet, krijimet dhe arritjet e tyre gjatë gjithë vitit shkollor.
Me krenari u bëmë “Miqtë e Mjedisit”, duke ndërmarrë nisma konkrete për mbrojtjen e tij.
Një ndër veprimtaritë më domethënëse ishte grumbullimi i tapave plastike, të cilat do të shërbejnë për të ndihmuar njerëzit në nevojë, në sigurimin e karrocave ose protezave, duke e kthyer kujdesin për mjedisin në një akt solidariteti dhe humanizmi.
Ky projekt na mësoi se ndryshimet e mëdha fillojnë nga veprat e vogla dhe se çdo fëmijë mund të bëhet një forcë pozitive për mjedisin dhe shoqërinë.
Së bashku mësuam, krijuam, bashkëpunuam dhe dëshmuam se kur dijet bashkohen me veprimin, lindin rezultate që lënë gjurmë.

"Çdo krijim i vogël është një hap i madh drejt zbulimit të talentit dhe bukurisë që fshihet brenda çdo fëmije."
EKSPOZITA E DUARVE TË ARTA
Gjatë gjithë vitit shkollor, nxënësit duarartë kanë krijuar me dashuri, përkushtim dhe imagjinatë punime të mrekullueshme. Në këtë ekspozitë, secili nxënës organizoi ekspozitën e tij personale, duke prezantuar punimet e realizuara me duart e veta të arta.
Çdo punim mbart një histori të veçantë, orë pune, përpjekje, bashkëpunim, kreativitet dhe pasion për të bukurën. Këto krijime janë dëshmi e talentit, durimit dhe zhvillimit të aftësive të tyre gjatë këtij viti shkollor.
Sot festojmë jo vetëm produktet e punës së tyre, por edhe rrugëtimin e bukur të të mësuarit, krijimit dhe ëndërrimit. Unë dhe prindërit e tyre jemi krenarë për secilin prej tyre dhe për gjithçka kanë arritur të realizojnë me duart dhe zemrat e tyre të vogla, por plot talent.

Ekskursioni ynë virtual
“Tradita në Lëvizje: Lojërat Popullore në Edukimin Fizik të Fëmijëve”
Në kuadër të projektit eTwinning në ESEP, zhvilluam një ekskursion virtual ku ftuam të marrin pjesë shkollat partnere nga Shqipëria dhe Kosova.
Gjatë këtij takimi të veçantë me temë “Tradita në Lëvizje: Lojërat Popullore në Edukimin Fizik të Fëmijëve”, njohëm nga afër lojërat popullore të traditës shqiptare, ato lojëra me të cilat janë argëtuar dhe janë rritur prindërit tanë.
I ftuar special ishte koleksionisti dhe studiuesi i lojërave popullore, Arben Trebicka, i cili ndau me ne njohuri të vlefshme për historinë, vlerat edukative dhe rëndësinë e ruajtjes së këtyre lojërave ndër breza.
Ky aktivitet ishte një mundësi e shkëlqyer për të mësuar, bashkëpunuar dhe për të mbajtur gjallë traditat tona.