Polis Akademiyası

Prezident İlham Əliyevin 18 iyun 2007-ci il tarixli Sərəncamına əsasən, hər il 18 iyun ölkəmizdə İnsan Hüquqları Günü kimi qeyd edilir. ⚖️ 📖

Polis Akademiyasında ixtisaslaşmış mütəxəssislərin iştirakı ilə dərslər davam edir

Polis Akademiyasında kursantların peşə hazırlığının daha da təkmilləşdirilməsi istiqamətində həyata keçirilən tədbirlər çərçivəsində müxtəlif sahələr üzrə ixtisaslaşmış mütəxəssislərin iştirakı ilə mühazirələr mütəmadi olaraq təşkil edilir. Bu dərslər kursantların həm nəzəri biliklərinin dərinləşdirilməsinə, həm də praktiki təcrübə ilə zənginləşdirilməsinə imkan yaradır.
Müxtəlif fənlər üzrə təşkil olunan interaktiv dərslərdə qonaq qismində DİN-in Katibliyinin rəis müavini, polis polkovniki Elvin Quliyev “Daxili işlər orqanlarında kargüzarlıq işinin təşkili və həyata keçirilməsi”, DİN-in Baş İstintaq və Təhqiqat İdarəsinin Ağır Cinayətlərin İstintaqı Şöbəsinin rəisi, polis polkovniki Elnur Novruzov “İbtidai araşdırmanın ümumi şərtləri və təqsirləndirilən şəxs qismində cəlb etmə”, Baş İstintaq və Təhqiqat İdarəsinin Yol nəqliyyat hadisələrinə dair işlər üzrə istintaq və təhqiqatı şöbəsinin rəisi, polis polkovniki Vüqar Əhədov və həmin şöbənin baş müstəntiqi, polis mayoru Ramin Əhədov “Hərəkət təhlükəsizliyi və nəqliyyat vasitələrin istismarı qaydalarının əleyhinə olan cinayətlərin araşdırma”, Azərbaycan Respublikası Vəkillər Kollegiyasının üzvü Tahir Əliyev “Vərəsəlik hüququ” mövzularında mühazirələrlə çıxış ediblər.
Dərslər zamanı mütəxəssislər tərəfindən nəzəri biliklərlə yanaşı, real təcrübədən götürülmüş nümunələr əsasında mövzular izah olunub, kursantları maraqlandıran suallar cavablandırılıb və peşə fəaliyyətində zəruri bacarıqların formalaşdırılmasına xidmət edən mühüm məqamlar diqqətə çatdırılıb.

Polis Akademiyasında “Müasir dövrdə insan hüquqları: qlobal çağırışlar və yeni yanaşmalar” mövzusunda dəyirmi masa keçirilib

Polis Akademiyasında “İnsan Hüquqları Aylığı” çərçivəsində “İnsan Hüquqları Günü”nə həsr olunmuş “Müasir dövrdə insan hüquqları: qlobal çağırışlar və yeni yanaşmalar” mövzusunda dəyirmi masa keçirilib. Tədbirdə Azərbaycan Respublikasının Konstitusiya Məhkəməsinin, Azərbaycan Respublikasının İnsan Hüquqları üzrə Müvəkkili (Ombudsman) Aparatının, Hüquq və İnsan Haqları İnstitutunun əməkdaşları, Polis Akademiyasının professor-müəllim heyəti və kursantları iştirak ediblər.
Əvvəlcə Ümummilli Lider Heydər Əliyevin və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad olunub. Daha sonra Polis Akademiyası rəisinin birinci müavini, polis polkovniki, hüquq üzrə fəlsəfə doktoru Vüqar Mansurov tədbiri açıq elan edərək qonaqları salamlayıb, insan hüquqlarının qorunması və təşviqinə həsr olunan belə tədbirlərin hüquqi maarifləndirmə və təcrübə mübadiləsi baxımından əhəmiyyətini vurğulayıb. Tədbirdə çıxış edən qonaqlar isə insan hüquq və azadlıqlarının müdafiəsinin dövlət siyasətinin prioritet istiqamətlərindən biri olduğunu qeyd edərək, “İnsan Hüquqları Aylığı” çərçivəsində keçirilən tədbirlərin əhəmiyyətindən danışıblar.
Daha sonra Polis Akademiyasının kursantları “Rəqəmsal təhlükəsizlik və insan hüquqlarının müdafiəsi”, “Sübutetmə prosesi zamanı süni intellekt texnologiyalarının tətbiqi və onun insan hüquqlarına təsiri”, “Süni intellekt vasitəsilə yaradılan əsərlərdə müəlliflik hüququnun yaratdığı problemlər”, “Süni intellekt və deepfake texnologiyalarının insan hüquqları sahəsində yaratdığı yeni çağırışlar” mövzularında məruzələrlə çıxış ediblər. Təqdimatlar iştirakçılar tərəfindən maraqla qarşılanıb.
Tədbirin sonunda çıxışlar ətrafında geniş fikir mübadiləsi aparılıb, müzakirələr təşkil olunub və iştirakçıları maraqlandıran suallar cavablandırılıb.

15 İyun - Milli Qurtuluş Günü 🇦🇿

Təcrübəli mütəxəssislər kursantlarla bilik və təcrübələrini bölüşüblər

Polis Akademiyasında kursantların peşə hazırlığının daha da təkmilləşdirilməsi istiqamətində həyata keçirilən tədbirlər çərçivəsində müxtəlif sahələr üzrə ixtisaslaşmış mütəxəssislərin iştirakı ilə mühazirələr mütəmadi olaraq təşkil edilir. Bu dərslər kursantların həm nəzəri biliklərinin dərinləşdirilməsinə, həm də praktiki təcrübə ilə zənginləşdirilməsinə imkan yaradır.
Müxtəlif fənlər üzrə təşkil olunan interaktiv dərslərdə qonaq qismində Azərbaycan Respublikası Vəkillər Kollegiyasının üzvü Səbuhi Axundov “Mülki hüquq pozuntularından (deliktlərdən) əmələ gələn öhdəliklər”, DİN-in Bakı şəhər Baş Polis İdarəsinin İstintaq və Təhqiqat İdarəsinin Təhqiqat şöbəsinin rəisi, polis polkovniki Tərlan Zeynalov “Cinayət işinin başlanması”, DİN-in Baş Narkotiklərə Mübarizə İdarəsinin Tədqiqatlar qrupunun rəhbəri, polis mayoru Nəcəf Aydınsoy “Narkotik vasitələr və psixotrop maddələrlə bağlı cinayətlərin araşdırma metodikası”, Azərbaycan Respublikası Vəkillər Kollegiyasının üzvü, De fendo Vəkil Bürosunun vəkili Vasif Hüseynli “Əmək mübahisələri”, AMEA-nın Fəlsəfə və Sosiologiya İnstitutunun Rəqəmsal sosiologiya və sosioloji tədqiqatlar şöbəsinin müdiri, sosiologiya elmləri doktoru, professor Səadət Məmmədova “Hüquq Sosiologiyası” mövzularında mühazirələrlə çıxış ediblər.
Dərslər zamanı mühazirəçilər müvafiq sahələr üzrə qanunvericiliyin tətbiqi xüsusiyyətləri, hüquq-mühafizə orqanlarının fəaliyyətində rast gəlinən aktual məsələlər, eləcə də peşə fəaliyyətində əldə etdikləri praktiki təcrübələr barədə məlumat veriblər. Təqdimatlar zamanı nəzəri biliklərlə yanaşı, real iş təcrübəsindən götürülmüş nümunələr əsasında mövzular ətraflı izah olunub, kursantların peşə hazırlığının gücləndirilməsinə xidmət edən mühüm məqamlar diqqətə çatdırılıb.

Polis Akademiyasında magistrlik dissertasiyalarının müdafiəsi uğurla başa çatıb

Polis Akademiyasında 2025/2026-cı tədris ili üzrə magistratura təhsil səviyyəsində magistrlik dissertasiyalarının müdafiəsi keçirilib. Bununla əlaqədar Akademiyada təhsil alan II kurs magistrantlarının magistrlik dissertasiyalarının müdafiəsi üçün yaradılmış İxtisaslaşdırılmış Elmi Şuranın iclası təşkil olunub. İclasda Akademiyanın “Hüquqşünaslıq” ixtisası üzrə təhsil alan 7 magistrantı magistrlik dissertasiyalarını təqdim edib.
İxtisaslaşdırılmış Elmi Şuranın tərkibində Akademiya rəhbərliyi və professor-müəllim heyəti ilə yanaşı, Bakı Dövlət Universitetinin, Milli Aviasiya Akademiyasının, Daxili İşlər Nazirliyinin Baş Kadrlar İdarəsinin, Baş Prokurorluğun Elm-Tədris Mərkəzinin və Ədliyyə Nazirliyinin Məhkəmə Ekspertizası Mərkəzinin nümayəndələri də iştirak ediblər.
Müdafiə zamanı magistrantlar elmi tədqiqat işlərinin əsas nəticələrini təqdim edərək mövzular üzrə nəzəri biliklərini, həmçinin analitik təhlil bacarıqlarını nümayiş etdiriblər. Dissertasiya işlərinin təqdimatından sonra geniş müzakirələr aparılıb, Şura üzvləri çıxış edərək tədqiqatların elmi yeniliyini, aktuallığını və praktik əhəmiyyətini yüksək qiymətləndirib, magistrantlara sual, təklif və tövsiyələrini çatdırıblar.
Dissertasiya işlərinin müzakirəsindən sonra açıq səsvermə keçirilib və hər bir iş üzrə qiymətləndirmə aparılıb. Qiymətləndirmənin nəticələrinə əsasən təqdim olunan magistrlik dissertasiyaları müvəffəqiyyətlə müdafiə olunmuş hesab edilib və 7 magistranta “magistr” ali elmi-ixtisas dərəcəsinin verilməsi barədə qərar qəbul olunub.

Hakim və prokurorlar kursantlarla təcrübələrini bölüşürlər

Polis Akademiyasında kursantların peşə hazırlığının təkmilləşdirilməsi və hüquqi biliklərinin artırılması məqsədilə məhkəmə və prokurorluq orqanlarının nümayəndələrinin iştirakı ilə mühazirələr keçirilib.
Dərslər zamanı məhkəmə və prokurorluq orqanlarının fəaliyyət istiqamətləri, cinayət mühakimə icraatının xüsusiyyətləri, cinayət-prosessual qanunvericiliyin tətbiqi praktikası, hüquq tətbiqetmə sahəsində aktual məsələlər və onların həlli yolları barədə ətraflı məlumat verilib. Təcrübəli mütəxəssislər hüquq-mühafizə fəaliyyətində peşəkarlığın, qanunçuluğun əhəmiyyətini vurğulayıblar.
Hakim və prokurorluq əməkdaşları peşə fəaliyyətlərində qarşılaşdıqları müxtəlif hüquqi situasiyalar və onların həlli mexanizmləri barədə məlumat verərək kursantlarla təcrübələrini bölüşüblər. Mühazirələr interaktiv formatda davam etdirilib, kursantları maraqlandıran suallar cavablandırılıb, hüquq tətbiqetmə təcrübəsinə dair müzakirələr aparılıb.

DİN-in Polis akademiyasının əməkdaşı “Hüquq-mühafizə fəaliyyətinin inzibati-hüquqi tənzimlənməsi: nəzəriyyə və təcrübə” mövzusunda keçirilən beynəlxalq elmi-praktik konfransda (video-konfrans formatında) iştirak edib

Polis Akademiyasında “İnsan Hüquqları Aylığı” çərçivəsində “Ən yaxşı təqdimat” müsabiqəsi keçirilib

Polis Akademiyasında “İnsan Hüquqları Aylığı” çərçivəsində “İnsan hüquqları və rəqəmsallaşmanın yaratdığı yeni çağırışlar” mövzusunda “Ən yaxşı təqdimat” müsabiqəsi keçirilib. Tədbir Azərbaycan xalqının Ümummilli Lideri Heydər Əliyevin və Vətən uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi, ardınca isə Dövlət Himninin səsləndirilməsi ilə başlayıb.
Polis Akademiyası rəisinin birinci müavini, polis polkovniki Vüqar Mansurov çıxış edərək Azərbaycan Respublikasında “İnsan Hüquqları Günü”nün qeyd olunmasının hüquqi dövlət quruculuğu, qanunun aliliyinin təmin edilməsi, insan və vətəndaş hüquq və azadlıqlarının müdafiəsi baxımından mühüm əhəmiyyət daşıdığını vurğulayıb və müsabiqə iştirakçılarına uğurlar arzulayıb.
Müsabiqədə Hüquq fakültəsinin kursantları müasir dövrdə insan hüquqlarının qorunması sahəsində meydana çıxan yeni problemlər və çağırışlarla bağlı aktual mövzular üzrə təqdimatlarla çıxış ediblər. Təqdimatlarda süni intellekt və deepfake texnologiyalarının insan hüquqlarına təsiri, “unudulmaq hüququ”, neyrohüquqlar, süni intellektin insan hüquqlarına müsbət və mənfi təsirləri, eləcə də hüquq sahəsində süni intellektin tətbiqi məsələləri geniş şəkildə təhlil olunub.
Kursantların çıxışları Akademiyanın professor-müəllim heyətindən ibarət münsiflər heyəti tərəfindən qiymətləndirilib. Yekun nəticələrə əsasən kursantlar Kamran Nuhuzadə I, Rəsul Abbasov II, Eşqin Abdullayev isə III yerə layiq görülüblər. Tədbirin sonunda qaliblərə sertifikat və hədiyyələr təqdim edilib, onların gələcək elmi fəaliyyətlərində uğurlar arzulanıb.

Polis Akademiyasında təcrübəli mütəxəssislərin iştirakı ilə keçirilən dərslər uğurla davam etdirilir

Azərbaycan Respublikası Daxili İşlər Nazirliyinin Polis Akademiyasında yüksək peşəkarlığa malik mütəxəssislərin iştirakı ilə keçirilən dərslər uğurla davam etdirilir. Təcrübəli mütəxəssislərin dərslərə cəlb olunması tələbələrin nəzəri biliklərini praktik vərdişlərlə möhkəmləndirməyə, həmçinin gələcək peşə fəaliyyətlərinə daha hazırlıqlı şəkildə başlamalarına şərait yaradır.
Müxtəlif fənlər üzrə keçirilən interaktiv dərslərdə qonaq qismində iştirak edən Sabunçu rayon məhkəməsinin hakimi Vüsal Qurbanov “İctimai təhlükəsizlik və ictimai qayda əleyhinə olan cinayətlər”, Hüquq və İnsan Haqları İnstitutunun İnsan hüquqları üzrə təlim və ekspertiza şöbəsinin müdiri Hamlet Babayev “İnsan və vətəndaş hüquq və azadlıqlarının məhdudlaşdırılmasının əsasları”, Milli Aviasiya Akademiyasının İqtisadiyyat və hüquq fakültəsinin dekanı, hüquq elmləri doktoru, professor Ayxan Rüstəmzadə “Azərbaycan Respublikasında məhkəmə hakimiyyətinin konstitusiya əsasları”, DİN-in Bakı şəhər BPİ-nin Dövlət Yol Polisi İdarəsinin Təşkilati-analitik şöbəsinin rəisi, polis polkovnik-leytenantı Qurbanəli Pirişov “Dövlət Yol Polisinin təyinatı və işinin təşkili” mövzuları üzrə mühazirə dərslərində iştirak ediblər.
Təcrübəli mütəxəssislər tərəfindən keçirilən dərslər zamanı ictimai təhlükəsizlik və ictimai qayda əleyhinə olan cinayətlərin xüsusiyyətləri, insan və vətəndaş hüquq və azadlıqlarının məhdudlaşdırılmasının hüquqi əsasları, Azərbaycan Respublikasında məhkəmə hakimiyyətinin konstitusiya əsasları, habelə Dövlət Yol Polisinin fəaliyyət istiqamətləri və işinin təşkili barədə kursantlara ətraflı məlumat verilib.
Tədris zamanı kursantları maraqlandıran suallar qonaqlar tərəfindən cavablandırılıb və mövzular ətrafında səmərəli müzakirələr aparılıb.