21/08/2025
كيف نعلم أولادنا مهارة الاعتذار؟
الاعتذار من أهم المهارات الحياتية فهي أحد أساليب حل المشكلات وتحمل المسئولية ومهارة لا غني عنها لبناء علاقات صحية قوية.
بعد مرحلة تعليم الأطفال الاعتذار وتحمل مسئولية اخطائهم تأتي مرحلة كيفية الاعتذار الصحيح وذلك بالتصحيح والتوجيه الصحيح بهدوء.
أمثلة لأنواع الاعتذار الخاطئ وكيف نصلحه:
1️⃣ الاعتذار بالتبرير
👦: “أنا آسف بس كنت متضايق/زعلان/ غضبان”
👉 الرد: “فاهم إنك متضايق وانا حاسس بيك.. بس حتى لو متضايق مينفعش نجرح حد …الاعتذار يكون من غير تبرير.. وبعدها قوللي اللي مضايقك.”
الهدف : حتى لا يتعلم تبرير غلطه بترخيص للإساءة ويدافع عن اساءته بدل ما يعترف بخطؤه.
2️⃣ الاعتذار باللوم العكسي
👦: “أنا آسف، بس إنت اللي خلّيتني أعمل كده”
👉 الرد: “اللي حصل مسؤوليتك إنت… حتى لو أنا ضايقتك ممكن تقولي ونحل المشكلة ..لكن الاعتذار لازم يكون كامل من غير رمي الغلط على غيرك.”
الهدف : حتى لا يتعلم سياسة "قلب التربيزة" ليبرء نفسه ويحمل الآخرين مسئولية اسائته ويسلبهم حقهم في الشعور بالأذى.
3️⃣ الاعتذار الغامض والعام
👦: “آسف لو كنت زعلتك.”
👉 الرد: “محتاج تقوللي الاعتذار علي الغلط اللي عملته: (آسف عشان كذبت/ قلت كلام مش مناسب)… عشان اعتذارك يبقى صادق وواضح ونقدر نصلح الغلط.”
الهدف : لا بيتكلم كأن الغلط غير واضح ويقلل من مشاعر الآخرين ويوهمهم ان إساءته لا تستحق وعاملوها بحساسية غير مبررة.
4️⃣ الاعتذار الساخر
👦: “آسف كنت بهزر!”
👉 الرد: “حتى لو شايفه هزار .. طالما زعلني يبقى مش هزار.. تعامل باحترام و بلاش هزار. في الغلط”
الهدف : حتي لا يتعلم ان يغلف الإساءة بالهزار ويوصل رسالة دائمة للآخرين إن المشكلة فيهم إنهم لا يفهمون الهزار.
5️⃣ الاعتذار المشروط
👦: “أنا آسف إذا كنت فهمت غلط.”
👉 الرد: “اللي حصل كان واضح ومفهوم انه غلط ومحتاج تقول (آسف عشان عملت كذا) من غير ما تلوم اللي قدامك.”
الهدف : لا يتعلم يرجع المشكلة لفهم الآخرين وليست في سلوكه دون أي تحمل لمسئولية الإساءة او الخطأ.
6️⃣ الاعتذار الإجباري أو المتضايق
👦: “خلاص آسف ..في حاجة تاني ..مبسوط كده ؟”
👉 الرد: “مش محتاج اعتذار غصب عنك ولا كلمة وخلاص ..محتاج تحس باللي عملته انه لا يجوز في حقي .. خد نفس وفكر تقول آسف باقتناع.”
الهدف : حتي لا يفقد اسفه القيمة الشعورية
7️⃣ الاعتذار الدرامي (المبالغ فيه)
👦 “أنا وحش.. أنا عمري ما بعمل حاجة صح!”
👉 الرد التربوي: “مش محتاج تقول إنك وحش إحنا كلنا بنغلط. أنا محتاجة منك تعترف بالغلط اللي حصل وتعتذر ببساطة.”
الهدف : عدم هروبه من الاعتراف الحقيقي بالغلط
كل مرة الطفل يخطيء هي فرصة لتدريبه وتوجيهه بهدوء أنه:
-الخطأ فرصة للتعلم
-يعترف بالتصرف بوضوح
-يتحمل مسؤوليته من غير لوم أو تهرب
-يعتذر بصدق
-يصلح ما أفسده
13/08/2025
إنك تختاري لأولادك أب صالح مهذب وحنون ومعطاء وكريم ورحيم وأمين ومسئول وقوي الهمة وتقي من أهم حقوق أولادك عليك ..
وإنك تتجوزي راجل غير كده ..تحت غمامة الحب أو المتعة أو فرحة الجواز ..أنانية وأكبر ظلم وتدمير لأولادك واهدار لحقوقهم ..
ياما أولاد عايشين مليانين قهر وظلم وألم وحزن وذل .. من قسوة وغلظة وبخل وإهمال وخسة وتخلي آبائهم ..
قرار الجواز
إما سبب تعاسة أو سعادة أولادك إلي الأبد ..
إما إحسان وبر أو أنانية وظلم إلي الأبد !
وحسن أو سوء الاختيار هيشكرك أو هيحاسبك عليه أولادك في يوم من الأيام ..
#تربية
#احسنوا
27/03/2023
للماميز اللي حاطين كل طاقتهم ووقتهم يعملوا لولادهم كل حاجة وأي حاجة ..التربية وبناء الشخصية بيقولوا أنت كده مضرة بأولادك
نعم "السوبر ماما" مضرة بالأولاد
وحتي الإشراف المباشر على اللي بيعرفوا يعملوه فوق دماغهم عشان يعملوه مصر ضرر بالغ!
السوبر ماما بتحرم ولادها من:
١- الايمان بقدراتهم المؤثرة بشكل مباشر علي ثقتهم في نفسهم وتقديرهم لذاتهم.
٢-تنمية وتطور مهاراتهم وبالتالي الصفات الشخصية لشخصياتهم.
٣- الاعتماد علي نفسهم المطلوب لينجحوا في حياتهم ويكونوا قد الحياة
٤- العطاء لٱخرين لأنهم هيعيشوا حياتهم أنانيين منتظرين من العالم خدمتهم وتقديم لهم كل ما يحتاجون علي طبق من فضة دون مقابل !
٥- التدريب مهارات التفكير وحل المشكلات واتخاذ القرارات لإنك بتعملها بالنيابة عنهم
والنتيجة ضعف عام في الشخصية ومهاراته
القاعدة ١ : أبداً مطلقاً لا تعملي شيئاً أو حاجة لابنك يقدر يعملها لنفسه مهما كانت النتيجة ...
ناخد وقت نعلمه وندربه ثم نتركه يطور في مهارة تحمله للمسئولية وثقته بنفسه !
القاعدة ٢ : أبداً متقوليش ده صغير .. عشان ميفضلش طول عمره صغير في عينه وعينك !
-هوني علي نفسك
-علمي ودربي ولادك يعتمدوا علي نفسهم ..
-وفري طاقة ووقت وجهد كتيييير قوي واستهلاكك انت شخصياً
-وفري جزء من اهتمامك لأبوهم اللي دائماً زوج السوبر ماميز ما يشكو ويعاني من اهمالها ليه ..وقد يتخذ خطوات تجاه من يهتم به بالخارج وزواجك يبقي على شفا حفرة من نار
#تربية
#السوبرمامايز
Samar ElShaboury
Samar El-Shaboury
Founder of Sway™
Character Education Consultant & Curriculum Designer
Parenting & Teachers Trainer
23/03/2023
أولادنا بيعيشوا بالمهارات الحياتية اللي بيتعلموها أياً كان تعليمهم ومستقبلهم الوظيفي أو الاجتماعي ... واللي في منها اللي بيكون سبب نجاحه في حياته الاجتماعية والعملية وفي منها اللي بيحتاجها لانقاذ حياته أو حياة آخرين :
20 مهارة حياتية ضرورية يجب تدريب الأطفال عليها :
1- توجيه الأسئلة.
2 -اتخاذ القرار بنفسه.
3-ابداء الرأي المخالف.
4-الرفض وقول كلمة "لا" باحترام.
5-السباحة.
6-الطبخ للأساسيات.
7-ادارة المال وتنميته او استثماره.
8-تنظيم الوقت والمهام.
9-قراءة التعليمات.
10-قراءة المكونات علي المنتجات الغذائية.
12-الاسعافات الأولية.
13-اصلاح الأغراض المختلفة.
14-اختيار الملابس والعناية بها.
15-التصرف اذا تاه أو ضاع.
16-الدفاع عن النفس.
17-التعامل مع الكائنات السامة.
18-اطفاء الحريق.
19-الرعاية بالرضع والصغار .
20-الدعاء.
ربوهم عشان يكونوا قد الحياة
Samar ElShaboury
Samar El-Shaboury
Founder of Sway™
Character Education Consultant & Curriculum Designer
Parenting & Teachers Trainer
