Bassant Mohamed

في ناس حياتها اتغيرت بسبب كلمة

وفي ناس فضلت سنين بتتعافى من أثر كلمة

عشان كده ربنا قال:
﴿ما يلفظ من قول إلا لديه رقيب عتيد﴾

لأن الكلمة مش بسيطة زي ما بنفتكر

كلمة واحدة ممكن ترفع إنسان
و كلمة واحدة ممكن تكسره

كلمة ممكن تفتح باب أمل
كلمة ممكن تقفل قلب وتخليه يشعر باليأس

عشان كده انتبه للكلمات اللي بتقولها لنفسك

لو بتقول انا ضعيف مش هقدر

مع الوقت عقلك بيصدق

ولو بتقول بحاول بتعلم

هتبدأ تشوف نفسك بشكل مختلف

كمان انتبه للكلمات اللي بتقولها للناس

وقبل ما تتكلم اسأل نفسك:

أنا بقول الكلام ده ليه؟

هل علشان أساعد؟
ولا علشان أوضح وجهة نظري باحترام؟
ولا علشان أجرح؟
ولا علشان أثبت إني صح وخلاص؟

لأن النية بتظهر في الكلمة
والكلمة بتتحول لأثر

خد بالك كلمة واحدة ممكن تفضل عايشة في قلب إنسان سنين

ركز علي نيتك
واختر كلماتك

فقد تكون كلمة منك سببًا في جبر قلب
أو سببًا في كسر قلب.

قد أفلح من زَكَّاهَا وَقَدْ خَابَ من دَسَّاهَا

‎ربنا ما طلبش إننا ما نزعلش
‎ولا ما نتوترش
‎ولا ما نغلطش

‎لكن طلب مننا نزكي أنفسنا

‎يعني كل شوية نراجع نفسنا
‎نفهم إحنا حاسين بإيه
‎ونشوف إيه اللي محتاج يتصلح جوانا

‎طبيعي إن الحياة تضغطنا
‎وطبيعي إننا نمر بمواقف تخلينا نتعصب أو نقلق أو نفقد حماسنا

‎لكن المهم ما نقفش عند النقطة دي

‎ادانا وسائل كتير تساعدنا نرجع توازننا

‎صلاة
‎دعاء
‎ذكر
‎قرآن
‎صحبة كويسة
‎تعلم

‎طبيعي نتأثر بالمواقف والكلام ونتألم

‎بس المشكلة إننا نفضل محبوسين في اللي حصل
‎ومش بنخرج منه ونفضل نلوم ونجلد في نفسنا

‎كل مرة بتفهم نفسك أكتر
‎كل مرة بتتعلم تتعامل مع مشاعرك بشكل أفضل

‎أنت كده بتزكي نفسك

‎وتزكية النفس مش رحلة ليوم أو أسبوع

‎دي رحلة عمر كاملة

‎بنقع ونقوم
‎ونتعلم وننمو
‎ونقرب فيها من أفضل نسخة من نفسنا

‎لو بصيت لنفسك النهارده

‎إيه الحاجة اللي محتاج تزكيها أو تشتغل عليها أكتر؟ #تقبل

الحرية ليست أن تمتلك كل شيء
الحرية هي أن لا يمتلكك شيء

كل تعلق زائد يخلق خوفًا
وكل خوف يسرق جزءًا من سلامك النفسي

لكن كلما تعلق القلب بالله
أصبح أكثر طمأنينة وثباتً

فالراحة النفسية لا تأتي من امتلاك كل ما نريد
بل من التحرر من التعلق المفرط بما نملك🤍

طريقة خوفنا
ثقتنا بنفسنا،
تعلقنا بالناس،
أو حتى إحساسنا بالأمان…

ما اتكونتش فجأة.

إريك إريكسون كان شايف ان كل مرحلة في نمو الإنسان بتأثر في اللي بعدها وإن كل مرحلة في الطفولة بيكون فيها احتياج نفسي مهم جدًا.

لو الاحتياج ده اتشبع بشكل صحي…
الطفل بيكبر وهو متوازن نفسيًا.

ولو الاحتياج ده ما اتشبعش…
الأثر بيفضل جواه ويظهر بعد كده في شخصيته وعلاقاته وطريقته مع نفسه ومع الناس.

من أول ما الطفل بيتولد لحد سنة ونص تقريبًا…
الطفل بيكون محتاج يحس بالأمان.

محتاج يحس إن

في حد سامعه…
حاسس بيه…
وبيستجيب لاحتياجاته.

ولما ده يحصل،
الطفل يبدأ يثق في العالم وفي الناس.

لكن لو عاش إهمال أو خوف أو عدم استقرار…
ممكن يكبر وهو خايف من القرب،
أو حساس للرفض،
أو مش قادر يثق بسهولة.

ومن سنة ونص لـ 3 سنين تقريبًا…
الطفل يبدأ يحاول يعتمد على نفسه.

يجرب…
يغلط…
يتحرك…
ويكتشف العالم بنفسه.

هنا احتياجه النفسي كان:
“الاستقلال”

ولو اتسمح له يجرب بشكل آمن،
بيكبر وهو عنده ثقة في قدرته على التصرف واتخاذ القرار.

لكن لو طول الوقت بيتمنع أو بيتحرج أو بيتقاله إنه غلط…
ممكن يبدأ يشك في نفسه،
ويخاف ياخد قرار،
ويحتاج تأكيد دائم من الناس.

ومن 3 لـ 5 سنين…
الطفل يبدأ يبادر أكتر.

يسأل…
يتخيل…
ويجرب.

لو اتعرض لنقد مستمر أو تخويف أو سخرية…
ممكن يبدأ يحس بالذنب.

يحس إن:
وجوده تقيل…
أو اللي بيعمله غلط…

وده ممكن يخليه بعد كده يخاف يبدأ،
أو يفضل يأجل،
أو يلوم نفسه بشكل قاسي.

ومن 6 لـ 12 سنة…
تبدأ المقارنات والتقييم.

وهنا الطفل بيكون محتاج يحس بالكفاءة.

محتاج يحس إنه
يقدر وإنه شاطر
وليه قيمة.

لكن مع المقارنة المستمرة والضغط والنقد…
ممكن يبدأ يحس بالنقص،
وإن مهما عمل فهو مش كفاية.

وده السبب إن ناس كتير ناجحة جدًا…
لكن جواها إحساس دائم إنها أقل من غيرها.

وفي المراهقة…
كل المراحل اللي فاتت بتظهر بوضوح.

المراهق يبدأ يسأل نفسه

“أنا مين؟”

ولو ما أخدش مساحة آمنة يكتشف نفسه ويجرب ويغلط…
ممكن يعيش تايه،
أو بيقلّد غيره،
أو مش عارف هو فعلًا عايز إيه.

📍📍اللي حصل زمان مش معناه إن خلاص كده

لما تفهم إن خوفك،
أو ترددك،
أو قسوتك على نفسك…

مش “عيب” فيك،
لكن جزء اتكوّن من تجارب قديمة…

ساعتها تبدأ تتعامل مع نفسك بشكل أهدى.

ومع الوقت،
تقدر تبني جواك أمان أكتر،
وثقة أكتر،

إحنا مش مسؤولين عن كل اللي حصل زمان…
لكن مسؤولين إننا نفهم نفسنا،
ونساعدها تتعافى ❤️

تفتكر إيه أكتر احتياج نفسي كان ناقصك وأنت صغير؟

#العلاقات

مفيش حاجة في حياتنا بتحصل صدفة...

كل موقف اتحطينا فيه...
كل كلمة سمعناها في وقت معين...
كل شخص قابلناه...
وحتى كل غلطة وقعنا فيها...

هي رسالة

رسالة بتعلمنا حاجة عن نفسنا...
أو بتنبهنا لشيء مش شايفينه...
أو بتجهزنا لمرحلة جاية لسه ما نعرفهاش.

المشكلة إن مش كل الناس بتشوف الرسائل دي.

في ناس بتشوفها مجرد أحداث عابرة...

وفي ناس بتقف وتسأل

"يا ترى الموقف ده جاي يعلمني إيه؟"

ومع الوقت...
السؤال ده بيخلق حكمة.

حكمة تخليك تبص للأمور بشكل مختلف...
وتتعامل مع المواقف بهدوء أكبر...

وتثق إن وراء كل شيء معنى حتى لو لسه مش واضح.

وحتى لو مفهمتش الحكمة دلوقتي...
بيكون عندك يقين إن فهمها هيجي في وقته وان اكيد في خير ليك

فمش لازم نعرف تفسير كل حاجة فورًا...

أحيانًا كل المطلوب إننا نصبر...
ونفضل منتبهين لرسايل ربنا لينا 🤍

#وعي #حكمة

كل عام وانتم بخير 🤍❤️
( ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ )
احيو سنة تكبيرات العيد