SVU Racing Team

Never Faded Away...

كل عام وانتم بخير 🤍

اليوم التاسع.. وسُنة اليقين والانقطاع التام

بكرة مش يوم عادي، ده اليوم اللي العتق فيه من النار بيوصل لقمته، وخير الدعاء دعاء يوم عرفة.

السُنة النهاردة هي الانقطاع التام وقت العصر لحد المغرب. اقفل اللاب توب، سيب الملازم، وافصل عن الدنيا كلها الكام ساعة دول. استجمع كل أمنياتك، همومك، امتحاناتك، ومستقبلك، وادعي بيقين إن اللي بتكلمه قادر يغير مقاديرك في ثانية. اليوم ده مافيهوش مستحيل، فماتبخلش على نفسك بالدعاء.

اليوم السابع.. وسُنة تصفية الحسابات

الاحتكاك الكتير بيولد خلافات. كلمة ضايقتك من زميلك في التيم، أو رد فعل وحش من حد بتحبه.

السُنة المهجورة هنا هي سلامة الصدر قبل النوم. إنك تنام ومفيش في قلبك ذرة غل أو شيل من حد. سامح اللي داس على طرفك من غير قصد بسبب ضغط الأيام دي. تصفية قلبك كل ليلة بتخليك أخف، وبتخلي روحك جاهزة تستقبل نفحات الأيام العظيمة دي من غير ما تكون متكتفة بالزعل.

اليوم السادس.. وسُنة الاستغفار

بما إننا في فترة امتحانات، فأغلبنا بيطبق ويسهر يذاكر لحد الفجر. هي كباية جد وساعتين شاي معروفة يعني.

بدل ما الوقت ده يضيع في التوتر، استغل سُنة الاستغفار بالأسحار. الـ ١٥ دقيقة اللي قبل أذان الفجر دي وقت سحري، ربنا بيمدح في القرآن اللي بيستغفروه في الوقت ده بالذات. وإنت قاعد على مكتبك وباصص في الورق، خلي لسانك شغال استغفار. الاستغفار بيفتح الأقفال، وبيفك عقد الفهم، وبيجيب البركة في الوقت الضيق.

اليوم الخامس.. وسُنة التبسم

عارف إيه السُنة اللي محتاجينها دلوقتي؟ "تَبَسُّمُكَ فِي وَجْهِ أَخِيكَ لَكَ صَدَقَةٌ". النبي ﷺ كان أكتر الناس هماً وشايل رسالة أمة كاملة، ومع ذلك كان "بَسّاماً". ابتسامتك في وش زميلك، أو كلمتك الهادية للتيم بتاعك، مش برود.. دي قمة الثبات الانفعالي وسُنة بتؤجر عليها، وبتهدي بيها روع اللي حواليك.

اليوم الرابع.. وسُنة الوضوء

الجو حر،قاعد بقالك ساعات بتذاكر، التركيز قل، عينك زغللت، وحاسس بـ Burnout وإحساس بالخنقة.

متجرب تجدد وضوئك حتى لو مش وقت صلاة. الماية مش بس بتغسل الأعضاء، دي بتطفي نار التوتر والقلق. الوضوء بيعمل Restart لروحك ولجسمك، وبيطرد الكسل. جرب لما تقفل معاك خالص ومخك يوقف، تقوم تتوضى وترجع تكمل.. هتلاقي طاقة وتركيز مكنتش متخيلهم.

اليوم التالت.. وسُنة الدعوة بظهر الغيب

وسط فرمة الامتحانات، كل واحد فينا حاسس إنه بيغرق لوحده، وتلاقي اصحابك على الجروبات بيصيحوا من صعوبة المادة. واللي مفعل وضع "انا اباجورة".

وهنا بتيجي سُنة مهجورة وذكية جداً: ادعيلهم في السر.
لما تدعي لصاحبك اللي متسوح في المذاكرة إن ربنا يفتح عليه ويسهلها له من غير ما يعرف، الملايكة بترد عليك وتقولك: "آمين، ولك بمثل". يعني إنت بتجيب دعوة مستجابة لنفسك في أكتر حاجة إنت مزنوق فيها، عن طريق إنك تتمنى الخير لغيرك. شير طاقة الدعاء في السر، وشوف التيسير اللي هيردلك.