Maisquemel.gal

NO MES DAS ABELLAS E DAS FLORES APRENDEMOS, EXPERIMENTAMOS E DESFRUTAMOS

🐝🌼Rematamos o Mes das Abellas e das Flores, no que vivimos un montón de bonitos momentos e experiencias enriquecedoras.

👉O obxectivo: aprender sobre a importancia das abellas e dos insectos polinizadores, tan necesarios para os nosos ecosistemas e para o medio ambiente.

🖼️Coa exposición "Cousas de abellas" e "Apiarte" achegámonos ó mundo das abellas e aprendemos moitas cousas sobre como son estes insectos, a súa función polinizadora e tamén sobre a práctica da apicultura.

🐌🐦Na Biblioteca Pública de Santiago Ánxel Casal desfrutamos do conto "Melisa perdeuse" coa compañía Garabullo, na que aprendemos sobre as distintas formas de vida, a cooperación e a amistade.

🕵️‍♀️🎻O 20 de maio o Museo de Historia Natural da Universidade de Santiago de Compostela acolleunos para celebrar o Día Mundial da Abella. Alí, experimentamos coa observación a través de microscopio e descubrimos moitos detalles sobre os insectos e outras curiosidades da natureza e a Escola Municipal de Música de Santiago de Compostela EMM ofreceunos un fermoso concerto de violíns e flautas, con melodías adicadas á natureza e ás abellas. E merendamos con mel e iogur grego, unha deliciosa combinación.

🥘🎨Rematamos o programa de actividades no LASSO. Cafetería do Auditorio de Galicia, onde as Mulleres Abelleiras Galegas ofrecéronnos un variado e interesante obradoiro: candeas, figuras de cera, broches, pintacaras, degustación de meles... E despois desfrutamos dun estupendo xantar elaborado cos produtos das abellas: glaseado de xamón asado con mel, salmón con salsa de cítricos, mel e mostaza, cenouras glaseadas con mel e mostaza, torrada e requeixo con mel.

💚👏Moitísimas grazas a todas as persoas que nos acompañaron e ás entidades colaboradoras, que fan posible que levemos adiante esta iniciativa.

👫👫Entre todas imos creando unha gran rede de amigas das abellas, agardamos que siga medrando para que cada vez máis persoas sexan conscientes da importancia de coidar das abellas e insectos polinizadores.

OBRADOIRO SOBRE O MUNDO DAS ABELLAS E XANTAR COS PRODUTOS DA COLMEA

Este sábado terá lugar un obradoiro sobre o mundo das abellas, a cargo das Mulleres Abelleiras Galegas, dirixido a público familiar e no que, a través de diferentes materiais, aprenderemos moito sobre estes pequenos insectos, os seus produtos e a súa función na natureza.

Tamén haberá unha degustación de meles de distintos tipos e procedencias, aportados polas Mulleres Abelleiras. Coñeceremos como son as variedades de meles galegos e falaremos da importancia de consumir meles de produción local e de proximidade.

A partir das 14 h. o Lasso ofrecerá un xantar especial para esta ocasión, con menú-bufete elaborado con produtos das abellas. Reservas: 981 57 38 07 ou por email a [email protected] (Prezos: 20 € / Ata 15 anos: 12 € / Ata 6 anos: 10 €)

E pola tarde, ás 17 h. trasladarémonos ata o Museo de Historia Natural para celebrar unha xuntanza das Mulleres Abelleiras Galegas, despois da cal visitaremos o museo. A participación é aberta a calquera muller interesada no mundo das abellas e non é preciso ter colmeas nin experiencia previa.

Coa colaboración de: Mulleres Abelleiras Galegas, LASSO. Cafetería do Auditorio de Galicia e Museo de Historia Natural da Universidade de Santiago de Compostela

20 DE MAIO: DÍA MUNDIAL DAS ABELLAS

O próximo 20 de maio celebraremos o Día Mundial das Abellas cunha gran xornada festiva no Museo de Historia Natural da Universidade de Santiago de Compostela.

Será o evento central do Mes das Abellas e das Flores, no que Santiago de Compostela se sumará a esta celebración mundial instaurada polas Nacións Unidas, que ten como finalidade divulgar sobre a importancia das abellas e demais insectos polinizadores no mantemento da biodiversidade e sensibilizar á sociedade sobre a súa protección.

PROGRAMA:

Todo o día: Portas abertas do Museo de Historia Natural (de 10.00 a 14.00 h. e de 16.30 a 20.00 h.)

A partir das 16.30 h.: Obradoiro “Un museo baixo o microscopio”. Sesións cada 15-20 minutos. Observación a través de lupas e microscopios para descrubrir detalles invisibles da natureza: células vexetais, minerais, insectos, escamas e moitos outros elementos do mundo natural que normalmente pasan desapercibidos á nosa vista.

De 17.00 a 19.30 h. Degustación de mel e outros produtos das abellas

Ás 18.30 h. Actuacións musicais do alumnado da Escola Municipal de Música:
– Dúo de Flautas: Irene Molina e Olaya Pereira “A abella Maya” (Karen Svoboda)
– Actuación de Saxo: Adrián Paderne “O oso e o mel” (Michiel Oldenkamp)
– Agrupación de violíns: ‘Margaridas’ (Tradicional Irlandesa)

Todas as actividades son abertas e de balde, ata cubrir o aforo do espazo.

Coa colaboración de: Museo de Historia Natural da Universidade de Santiago de Compostela, Asociación Amigos Museo de Historia Natural e Escola Municipal de Música de Santiago de Compostela EMM.

EMOCIÁNDONOS COA ABELLA MELISA E AS SÚAS AVENTURAS

O pasado sábado desfrutamos do conto "Melisa perdeuse" da compañía Garabullo na Biblioteca Pública de Santiago Ánxel Casal.

Unha fermosa experiencia, chea de risas, emocións e aventuras, nas que acompañamos á abella Melisa na busca do seu fogar, coñecendo outros animais do bosque e aprendendo sobre as diferentes formas de vida na natureza, a importancia da amizade e a cooperación.

Grazas a todas as crianzas, mamás e papás, por acompañarnos e encher o salón de actos da biblioteca ano tras ano, á Biblioteca Pública de Santiago Ánxel Casal por acollernos de novo para celebrar a importancia das abellas e a Rula e Helder, da Compañía Garabullo e espazo educativo Kokoro, por emociarnos cos seus contos...

Seguiremos escoitando máis historias sobre a abella Melisa e agardamos vervos nas vindeiras actividades do "Mes das Abellas e das Flores"!

COUSAS DE ABELLAS E APIARTE

Onte inauguramos as exposicións "Cousas de abellas" e "Apiarte" na Biblioteca Pública de Santiago Ánxel Casal.

"Cousas das abellas" consta de 8 paneis didácticos sobre a vida das abellas e os seus produtos. "Apiarte" é unha selección de obras de distintos artistas que acompañan os paneis didácticos para facelos máis comprensibles.

O conxunto das dúas exposicións, xunto cos audiovisuais e equipamentos apícolas, conforman un todo e dannos unha visión sobre a importancia das abellas e os seus produtos para a saúde e o medio ambiente.

Do 5 ó 16 de maio, no vestíbulo da biblioteca. Non vola perdades!

MES DAS ABELLAS E DAS FLORES 2026

No mes de maio Máisquemel organiza en Santiago de Compostela o “Mes das abellas e das flores”, con motivo da celebración do Día Mundial da Abella o día 20 de maio.

O programa inclúe exposicións sobre o mundo das abellas, proxección de audiovisuais, contacontos, obradoiros e xantar temático. Unha chea de actividades que achegarán a todos os públicos ó mundo das abellas e do resto de insectos polinizadores, para aprender cal é a súa importante función na natureza e todos os beneficios que nos aportan.

As actividades terán lugar entre a Biblioteca Pública de Santiago Ánxel Casal e o Museo de Historia Natural da Universidade de Santiago de Compostela. Este ano ademais, incorporamos un novo espazo: LASSO. Cafetería do Auditorio de Galicia

Tamén contaremos coa colaboración de varios colectivos e outras entidades: Ecomuseo Casa das Abellas, Mulleres Abelleiras Galegas, Asociación de Amigos do Museo de Historia Natural e a Escola Municipal de Música de Santiago de Compostela EMM.

Aquí tedes toda a información: https://maisquemel.gal/mes-das-abellas-e-das-flores-2026/

Agardámosvos!

🌞🌺🪻ESTÁ CHEGANDO A PRIMAVERA... E CON ELA O DÍA MUNDIAL DA ABELLA! 🐝🐝🐝

Por fin se achega a primavera... polo que en Máisquemel estamos comezando cos preparativos do Día da Abella!

Como todos os anos, celebraremos este día tan especial para nós e o mundo das abellas en Santiago de Compostela, cos nosos colaboradores habituais: Biblioteca Pública de Santiago Ánxel Casal e Museo de Historia Natural da Universidade de Santiago de Compostela, ademais doutras novas e interesantes propostas.

👀Prestade atención á nosa web e redes porque iremos publicando información en breve!

Dende Máisquemel queremos desexarvos unha boas festas de Nadal e un feliz ano 2026 chego de abellas e de flores!

DESCUBRINDO A TRADICIÓN ABELLEIRA DO VALADOURO NO IV ENCONTRO DE MULLERES ABELLEIRAS GALEGAS

O pasado 29 de novembro celebramos o IV Encontro de Mulleres Abelleiras no Museo do Mel do Valadouro O Trobo.

Marifé Sixto, unha muller abelleira que provén dunha familia adicada á apicultura dende varias xeracións, fundou este museo que foi construíndo pouco a pouco, adaptando diferentes espazos anexos á vivenda familiar. O museo alberga obxectos, ferramentas, fotos e libros que pertencían principalmente á súa familia e que Marifé amosa con ilusión, explicando a historia que hai detrás de cada peza.

A sesión da mañá comezou coa presentación das asistentes á xornada, na que coñecemos a novas abelleiras que se animarcon a entrar no proxecto. Despois da visita ó museo, continuamos cunha mesa redonda sobre as experiencias da incorporación na apicultura de dúas mozas abelleiras, que relataron a dificultade da burocracia e a pouca flexibilidade das axudas para adaptarse as condicións variables da apicultura. Para rematar a mañá, debatimos sobre a participación da muller na apicultura no pasado e na actualidade. Entre os factores que favorecen o empoderamento das mulleres abelleiras, está a presenza e participación real nas organizacións, para o que é fundamental que haxa referentes e que se ofreza formación a cargo de mulleres.

Pola tarde visitamos o Castelo de Alfoz, onde coñecemos a súa historia e visitamos as exposicións de varios artistas da zona. Alí tivo lugar un momento de reflexión e debate sobre o futuro do colectivo e, para rematar, probamos os variados meles que trouxeron as mulleres abelleiras.

Grazas Marifé Sixto por acollernos no seu fermoso museo e as mulleres abelleiras que se animaron a participar nesta interesante e fructífera xornada!

O artigo completo en: https://maisquemel.gal/descubrindo-a-tradicion-abelleira-do-valadouro-no-iv-encontro-mulleres-abelleiras-galegas/