Dana Lai Yoga

好幾年前，有位自稱「資深」嘅新學生報名嚟上堂，直接便報了中級瑜伽班。

一整堂，佢對任何指引都似乎聽而不聞。下課後，佢有點不耐煩咁問我：「中階哈達瑜伽就係咁樣嗎？有冇流動快一點的哈達？」

也曾經有學生一進入課室，便預先說明：「唔洗在意我，我好多動作都做唔到。我就係天生身體又硬又無力，亦有好多傷患。」

其實，這些反應我都明白。
我們大概都花了二、三十年，甚至更長時間，去學會一套身體的習慣。怎樣企，怎樣用力，怎樣避開唔舒服，怎樣在還未真正感受之前，就先判斷自己「做唔到」。

我們也花了很多年，學會一套腦袋的習慣：
「我已經知道了。」
「呢個唔適合我。」
「我就是這樣。」
「可不可以直接跳過呢啲，做些我想做嘅？」

有時候，我哋以為自己是在選擇適合自己的練習。
但其實，我們可能只係一次又一次，重複自己最熟悉的慣性。

上課變成了，只做自己一向會做的。
或者，一手推開自己一向不想面對的。
瑜伽練習最不容易嘅地方，往往唔係高難度動作。
而係願不願意，在嗰一刻停下來聽。
聽身體真正的狀態。
聽老師給出的方向。
也聽見自己心裡嗰個好急、好想證明、好怕落後、好怕被看見不足嘅聲音。

習慣一定係壞的嗎？
唔一定。
但如果我哋聽都冇去聽，又如何知道呢個習慣喺呢刻是仍然適合自己？
如果我哋習慣了不聽，嗰個「不聽」本身，可能已經成為一個需要被照見的習慣。

所以後來，我把所有低、中、高班的名稱都剔除了。
只剩下「瑜伽初學者」和「超過初學者」。
呢個分水嶺，不是誰的腳拉得比較高、後彎彎得深又夠大力、不是誰可以做到更多動作、也不是誰練了多少年。

而係聆聽自己的能力。
自己能否一次又一次，放下期望去聽？
放下自尊去聽？
放下比較去聽？
放下「我應該已經可以」嘅想法去聽？

有些同學聽到自己暫時未適合上「超過初學者」的課，心裡會難過。這份難過，我其實很明白。
因為我們都希望自己有進步。
我們都希望努力了幾年之後，可以得到某種肯定。
我們都希望有人告訴自己：「你已經可以了。」
但瑜伽有時給我們的，不是外界嘅肯定。
而係更深嘅照顧。
如果身體還未準備好，勉強自己進入更強、更快、更複雜嘅練習，可能只會令身心更緊張。

如果心還在比較、證明、著急之中，即使去了更高階的課，也未必會更接近瑜伽。
瑜伽唔係為了升班呢。
唔係為了證明自己比以前厲害。
亦唔係為了得到一個「advanced」的身份。

瑜伽係讓我們慢慢看見，自己正在抓緊啲乜嘢。
看見身體怎樣代償。
看見心怎樣抗拒。
看見自己怎樣用舊方法，面對新嘅當下。
然後，一點一點，實行減法。
少一點急。
少一點夾硬。
少一點比較。
少一點「我應該要做到」。
少一點對自己嘅誤解。

不是所有停留，都是退步。
有時候，願意停喺初學者嘅位置，願意重新聽，重新學，重新感受，反而是很深嘅進步。
真正不再是初學者，唔係因為我哋終於做到更多。
而是因為我哋開始明白，瑜伽不是不斷加上些甚麼。
而係慢慢拆走那些令自己離開身體、離開當下、離開真實嘅東西。

聽得見，才有機會聽得懂。
聽得懂，才有機會真正照顧自己。
咁樣，可能先係瑜伽一直想帶我哋回去嘅地方。

你嘅說話係毒藥定蜜糖？

唔係問你講嘢係咪好聽——係問每一句話背後嘅能量。同一句說話，出自恐懼係毒，出自清明係蜜。

喉輪（Viśuddha）嘅字根係 Visha（毒）+ Shuddhi（純化）。

佢唔係一個「本來就乾淨嘅地方」，而係一個轉化嘅容器。佢嘅工作唔係避免接觸毒，係有能力承載佢、轉化佢。

所以喉輪失衡有兩個方向——
「唔出聲」嘅人以為沉默係謙遜；
聲大夾惡嘅人以為開口就係金句。
其實，兩樣都唔係。

瑜伽哲學入面，Satya（真實）唔止係「唔講大話」——係對自己誠實，包括誠實地承認你收聲或開口嘅原因。

華人文化話「沉默係修養」，佛教文化話「唔批判係清淨」——兩樣夾埋，令噤聲變得高尚。

但 Satya 要你問清楚自己：你係真係清醒，定係驚衝突、驚被標籤，用「保持和氣」包裝緊自己嘅迴避？呢個唔係清淨，係恐懼扮成謙遜。

。
 。

差別唔係你講咩，係你點解要講。

講完之後留意身體——心係輕嘅，通常係真實；有種隱藏嘅滿足感，或者事後有內疚，通常係批判混咗入去。

印度神話入面，濕婆（Shiva）吞下毀滅性劇毒 Halahala，用喉輪將毒封住、純化，喉嚨因此變成深藍色，得名 Nilakantha——藍喉者。

佢嘅教導唔係「唔好接觸毒」，係「有能力承載毒、轉化毒，唔讓佢下沉腐化」。

你唔講真話，毒唔會消失——只係喺你入面積累。壓下去嘅毒，才係真正嘅毒。

真正嘅清明唔係唔開口，係清醒地開口——唔批判，唔討好，唔迴避。

Satya 同慈悲唔係對立。真正嘅慈悲，係有時候願意講出對方唔想聽但需要聽嘅話。

呢個，先係喉輪真正打開嘅狀態。

.
大部分人學 meditation，都係從一個問題開始：「我應該點做？」

但可能更誠實嘅問題係：「 #我究竟要點樣同自己相處？」

瑜伽傳統告訴我哋，meditation 唔係一個動作，而係一種狀態。你唔係「做冥想」，而係慢慢「變得 meditative」——就好似「溫柔」唔係你刻意表演出嚟，係你做人嘅一種質素。

我記得自己當年學冥想嘅時候，以為要見到光、聽到聲、要跟某種儀軌，先算係「做到」。後來先明白：嗰啲體驗，有時反而係令你愈走離自己愈遠。

真正嘅 meditation，係向內跌返去自己最深嗰一層。嗰度未必有光、有聲、有畫面，你只係安靜咁同自己坐喺一齊。但嗰個「冇嘢發生」，往往比最戲劇性嘅體驗，更加接近冥想嘅本質。

我哋好多人都花大量時間喺外面追逐——關係、身份、別人點睇我——卻從來唔知點樣向內睇自己。長此落去，外在嘅壓力同期望，自然就會慢慢蠶食自己。

Meditation 想帶你去嘅地方，唔係乜嘢特別境界，而係返屋企。


亦都係寫比而家仍然係迷霧入面嘅你。

為何瑜伽堂上有人瞓著？
有人放鬆唔到？

你有冇留意，一到靜心或大休息，就有人即刻瞓着；但亦有人點想靜都係關唔到機？

其實背後， 。

Prana 可以理解成身體入面，令一切「郁得起身」嘅智慧流動——唔淨止係呼吸入面嗰啖氣，仲包括神經訊號點樣傳、血液點樣流、細胞點樣產生能量、同身體幾時揀時間去修復自己。

當呢種流動平衡時，身體能自然切換應付外界與內在修復；當失衡時，可能導致堂上瞓著（過度虛耗）或放鬆唔到（警戒狀態未解除）。


長期處於高刺激狀態（工作、家庭、社交），感官不斷被外界拉扯，prana 就會不停向外流去供應「應付世界」。久而久之，內在嘅能量流動開始失衡，好多氣會堆積喺頭、眼、喉、胸——即係你成日用嚟「諗嘢、睇嘢、講嘢、頂住情緒」嗰啲地方。

壓力、焦慮、長時間坐住唔郁，會令呢啲本身已經好忙嘅部位更加「塞上加塞」，prana 難以下沉。身體習慣性喺上半身「儲備」能量去頂住外界，而唔係俾資源落返去修復同休息。
瑜伽堂上發生咩事？

透過呼吸、體式同停留，神經系統開始由「向外警戒」慢慢轉去「向內修復」。

#為何有人特別想瞓？
因為身體終於唔使再將能量拎去頂住外面！自然用返資源做最基本但平時最欠缺嘅事：休息、整合、修補。

#為何有人點都瞓唔着？
可能係 prana 暫時仲係偏向頭部、感官同警戒系統——未完全願意退返入修復模式。呢個唔係失敗，只係神經系統仲未夠信任「而家安全」。

當你每次願意留喺個瑜伽蓆上，慢慢等氣沉落嚟，本身已經就係一個好練習。

#氣身與情緒
用瑜伽哲學去睇，人唔只得一副肉身，仲有一層由 prana 組成嘅「氣身」（pranamaya kosha）。呢層氣身點樣流動，會直接影響你情緒穩唔穩、個腦係清晰定係渾噩，甚至影響你可唔可以真正放低，投入休息。

透過體式、呼吸同內觀，氣可以慢慢由向外散，變成向內收；由浮，變成沉；由亂，變成穩定。

練習本身唔係要逼自己瞓著，而係慢慢學習：點樣令氣有地方下沉降落。

所以，下次你發現自己要醒嘅時候瞌眼瞓，或者點捵床捵蓆都瞓唔著，都可以觀察吓：「自己嘅氣，最近大部分時間，係向邊度流緊呢？」

我係 Dana@sowyogahk

做瑜伽做到隻腳震震，係失禮定係正常？

好多人第一個反應係先縮一縮——扮冷靜、扮冇事、暗暗希望冇人睇到。但其實，你個身體只係喺度做一件好正常，甚至係好重要嘅事。

#科學咁解釋：
⚠️肌肉長時間出力之後能量耗盡，部份纖維死撐，部份想放鬆，兩邊拉扯就係震。
⚠️你腰入面最深嗰條肌肉——腰大肌——直接受自律神經控制，長期壓力會令佢悄悄鎖住。當你喺練習入面夠放鬆、夠安全，神經系統就會自動觸發震顫反應，直接繞過「思維腦」，釋放平時意識控制唔到嘅深層緊張。

唔係你叫佢震佢就震——係你個身體終於有空間放手。

#瑜伽咁睇：
⚠️生命能量/氣（prana）喺身體通道流通，受阻就變成鬱結同麻木。震動，係氣流到久違角落嘅「聲音」。
⚠️瑜伽哲學亦認為我哋唔只係一副肉身，而係由五層身體疊喺一齊——肉身、氣身、情緒身、思維身、喜悅身。你喺墊上震嘅時候，唔只係隻腳嘅反應，係好幾個層次同步喺度鬆動緊。

動物不會壓抑震動。 佢哋受驚之後全身抖一抖，完成未完成嘅「戰鬥或逃跑」反應，然後繼續行。我哋人類本來都係咁——只係學識咗「唔好喺人前抖」，慢慢將呢個天生嘅釋放本能壓制咗。

震完之後覺得「輕咗」「通咗」「好奇怪但舒服咗」？唔係你諗多咗。係身體排走咗一啲嘢，而嗰啲嘢，係你可能帶咗好耐。

瑜伽講 Tapas——「燃燒」——唔係叫你用瑜伽操爆自己，而係你願意喺唔舒服嗰個位停留，讓舊嘅緊張及慣性被慢慢燒熔。

下次震起上嚟，唔需要扮冷靜。
震，唔係終點—— 。

有冇試過，做做吓瑜伽，突然好想喊？
有時係如釋重負嘅眼淚，
有時係感慨自己行到今日嘅眼淚，
有啲係攰到入心入肺，終於頂唔順，
有啲係諗起過去咗嘅人或事，默默喺度哀悼。
眼淚嘅款式，可以有一千萬種。

平時，我哋大概都「知」自己為咩想喊，
或者至少以為自己知。
踢親隻腳趾、經歷緊分手、有親人離世——呢啲都係好「合理」嘅流眼淚理由。

但更多時候，只係壓爆駱駝背脊嘅最後一根草：

朝早瞓晏咗，一打開眼已經有一大堆訊息要覆；
返到屋企，姐姐做漏嘢又講一輪廢話幫自己解畫；
老闆再塞新 project 比你，就算之前幾個星期已經通宵趕deadline；
屋企嗰位「老馮」，連續幾日煮飯從未講過一聲多謝；
去接小朋友，學校發個通知暗示你唔夠投入，
好似你就係一個時間管理混亂、照顧不周嘅失敗家長。
終於返到上車，發現差人已經抄咗一張違例泊車告票比你。

就係嗰一秒，你忽然停唔到咁喊出聲——喊到講唔出說話，嗰啲眼淚，已經一早超越晒今日嘅零星小事。

呢啲眼淚，唔淨只係屬於「今日」嘅

係積咗好耐嘅委屈、心淡、唔甘心、內疚，
一日接一日、一年接一年咁堆起嚟，
終於喺某一個唔起眼嘅 moment，
搵到個缺口，全部一齊沖出嚟。

入面有你幾年嚟喺工作上受過嘅委屈，
有你為人父母嘅內疚，懷孕時嘅驚同辛苦，
有你同伴侶之間一大堆複雜、糾纏不清嘅感情，
有你之前一次又一次覺得自己唔值得愛、委屈自己去迎合人，
甚至有你讀緊小學、七歲嗰陣，
拎住老師記你「大過」嘅手冊返屋企，
驚到唔知點樣同呀媽交代嗰個心。

我哋裏面其實裝住嘅嘢，遠遠多過我哋自己嘅以為。

日常裡面，我哋成日都覺得：
「我知我而家咩心情。」
「我 handle 到嘅。」
我相信自己可以控制到一切。

但有時，喺瑜伽堂上，
明明冇特別嘢發生，自己就係突然想喊。

嗰啲眼淚唔需要有理由——
如釋重負係、感恩係、攰到入心係、
甚至你自己都唔知點解嘅，都係。
眼淚唔守規矩、眼淚唔會擇日睇時辰，
佢住喺你骨頭裡面、
住喺你好耐之前聽過嘅嗰句歌詞入面，
住喺你對自己嘅苛刻同執著裡面。

瑜伽叫呢啲做 Samskara——心印、舊疤痕。
真正有效嘅瑜伽練習，唔淨只係去軟化、拉開肌肉，
亦係慢慢鬆返啲你從來冇時間理嘅舊痕。

當你喺墊上放慢、呼吸、放鬆，
其實你係比緊呼吸同覺知，
慢慢照入去身體裡面嗰啲暗角
嗰啲硬咗、緊咗嘅地方，
嗰啲係胸口周圍、腰背附近比你用嚟「撐住」自己嘅肌肉。
呢啲位被照到嗰刻，本身就係療癒。
呢啲唔係一種「我想通咗」嘅感覺，
係比身體真正感受、放低嘅感覺。
所以如果你喺 savasana 突然眼濕濕，
唔使諗點解，亦唔使解釋，
只需要知道：
你個身體，終於肯放低
啲揹咗好耐、從來唔捨得放嘅嘢。

我係Dana

流汗，其實首先只係一個好基本、好正常嘅生理現象。
佢唔係練習嘅成績表，亦唔關 spiritual level 事。
佢只係你個身體，安靜咁喺度保護你。

當你開始郁動、心跳快咗、體溫升高，
大腦入面負責體溫嘅中樞就會 send 訊號比汗腺：
「可以幫手降溫喇。」
汗水去到皮膚表面，慢慢蒸發嗰陣會帶走熱量，
幫你 keep 喺一個安全嘅溫度。
流汗，就好似身體嘅「冷卻系統」，
而唔係出事嘅警號。

外面好多人講「流汗＝排毒」，聽落好吸引。
但好多醫學文章都話：汗大約 99% 係水，
其餘只係少量電解質同代謝產物；
真正幫你「清垃圾」嘅主力係肝、腎同腸道。
汗嘅主要工作係降溫，唔係負責處理「毒素」。

同一堂瑜伽，有人由 warm-up 已經額頭見汗，
有人成堂都只係微微暖身。
差異好多時係體質、瞓唔瞓得好、飲水、壓力、室溫、濕度、着咩布料、練習強度。
所以流多汗嗰個，唔一定用力啲、堅啲；
流少汗嗰個，亦未必偷懶。
運動生理都會強調：出汗主要係散熱，
汗多汗少，同你真正消耗幾多能量，冇一條直線可以畫。

「咁如果成堂都冇乜汗，係咪代表我冇練到？」
瑜伽嘅效果，其實唔係用「汗量」去判斷。
諗下你做陰瑜伽、修復式、或者靜坐嗰啲日子，
個身體可能冇乜郁，外面好乾爽，
但呼吸、神經系統、內心節奏，已經完全唔同晒。
。

另一邊，有啲人好鍾意「爆汗好爽」嗰種感覺。
我明，因為真係會覺得鬆晒、好似由內到外沖咗個涼。
但流汗量多，唔等於你「你個pratice比較精進」，
可能只係你個冷卻系統比較「勤力」。
真正影響你用咗幾多能量嘅，係你練咗幾耐、幾用心去理解，你本身嘅身體狀況。

要留意嘅係：
如果你「郁少少就爆到成身汗」、
易頭暈、心口翳悶、甚至抽筋，
日常行幾步路都大汗淋漓，
嗰啲有機會同甲狀腺、自律神經、心血管或者其他狀況有關，係值得搵醫生睇清楚，而唔係逼自己個身體再頂多陣。

仲有一樣，係我喺教室成日見到：
有啲同學嘅困難唔係汗本身，
而係「一熱就好鬼忟憎」嘅嗰份情緒。
明明只係少少熱、少少黐立立，
個心已經開始鬧自己、鬧隔離、鬧課室、鬧天氣。

我哋好少被教過，
要點樣喺一個「唔太舒服，但仍然安全」嘅狀態入面，
冷靜咁陪自己多留幾個呼吸。
反而好習慣一唔舒服，就即刻逃走、收緊、發脾氣。

對熱、對汗嘅憎惡，
好多時其實係我哋仲未好識，用 ahimsa（非暴力）
去對待自己嘅身體同感覺。

所以，下一次你喺墊上開始出汗，
可以試吓唔好咁快用「多唔多汗」去評價自己。
唔急住話：「今日冇汗，應該做得唔夠。」
亦唔急住話：「今日爆汗，咁就叫做有交代。」

你可以改為問自己幾條唔同嘅問題：

今日我有冇對身體誠實？
喺唔舒服嗰刻，我有冇試吓同自己一齊呼吸多幾下？
當我真係唔舒服、唔安全，我有冇肯停低？

流汗、心跳加快、肌肉發熱，
都係你個身體喺度參與呢場練習嘅方式。
你可以輕輕同自己講：

「原來，我個身體，一直都好努力，喺度陪我一齊練瑜伽。」

呢篇專講一樣大家上堂都好驚出現、
但其實好正常嘅身體反應：放屁！

在瑜伽教室裡，
放屁其實比你想像中「正常」得多，
只係大家都好努力假裝無呢件事。

多數情況，其實係好正常嘅：
身體郁得多咗、呼吸深咗、
腸胃開始「醒返」，啲氣自然會搵出口。

好多嘅瑜伽動作本身，
就好「幫助排氣」
扭轉、抱膝、嬰兒式、橋式，
就係幫你條大腸慢慢「按摩」。
啲氣本身喺入面，依家只係俾你啲動作
推一推、移一移，行到落出口附近。

呼吸越深，腸就越醒
深長呼吸、腹式呼吸，
會令橫膈膜上下郁動，
好似幫腹腔「泵上泵落」咁。
加上身體由緊張模式
轉去「休息同消化」模式，
腸道開工，自然就會「排風」

喺瑜伽入面，放屁都有名堂
傳統講五種「氣」：
💭 Prana 生命氣
💭Apana 下行氣
💭Samana 平衡氣
💭Udana 上升氣
💭Vyana 遍行氣
放屁、排便、排尿、月經、生仔呢啲
都係 Apana Vayu 嘅範圍——
一種向下、向外嘅能量流動。

淨化能量，唔係淨係用燭光同頌缽
瑜伽傳統入面講嘅「淨化」，
唔只係情緒釋放或者靈性體驗。
汗、鼻涕、眼淚、打嗝、放屁、去廁所，
都係身體好實在嘅淨化身體、釋放能量。

但我哋總係比較鐘意講
「昆達里尼上升、能量往上提昇」之類…
卻忘記咗如果無Apana嘅穩定向下，
所有往上嘅追求都只會變得飄忽、唔落地。

真正辛苦，有時係嗰個「尷尬」嘅聲

好多時唔係個屁本身有問題，
而係自己腦入面嗰把聲：
「死啦，好唔靈性，好樣衰！」
「做瑜伽仲放屁，好尷！」
呢把聲好多時只係
社會灌輸嘅身體羞恥與「靈性形象」
並唔係瑜伽要你相信嘅嘢。

如果你真係好驚喺堂上失守…
可以試吓：
📍上堂前 2–3 小時，唔好食太 heavy／易脹氣嘅嘢
📍提早啲到，先去廁所
📍喺屋企先做幾個抱膝、扭轉，
 俾「最急嗰幾個💭」走咗先

上到堂，真係忍到好辛苦嘅時候…
噗 💭 … 出咗聲，點算？

很好，腸道好活躍！
當佢係一個普通聲音：
好似窗外車聲、樓上裝修聲、肚仔叫…
將注意力帶返去呼吸同當下個動作。
通常最快忘記呢件事嘅，係其他人。
唯一記好耐嘅，只係我哋自己。

喺我嘅課，你可以係一個會放屁嘅人！
唔需要做一具
「完美、無味、無聲」嘅屍體。
你可以係一個會流汗、會震、會流淚，
甚至偶爾會放屁嘅人。
瑜伽唔係要你變完美，
瑜伽係嚟幫你學點同真實嘅自己相處。

我係Dana