URDU ADAB LKO

مزاج شخص جہاں تھا ترے مرض سے سست
ہوا سو فضل الٰہی سے تندرست و چست

خبر جو گرم ہے اب تیرے غسل صحت کی
دل شکستہ جہاں تھا وہ خودبخود ہے درست

رہے جہاں میں بہت توکہ تاجہاں بھی رہے
سلامت ہمہ آفاق در سلامت تست

میر تقی میر

کھویا ہوا سا رہتا ہوں اکثر میں عشق میں
یا یوں کہو کہ ہوش میں آنے لگا ہوں میں

یہ ابتدائے شوق کی حالت نہ ہو کہیں
محفل میں اس سے آنکھ چرانے لگا ہوں میں

اب کیوں گلہ رہے گا مجھے ہجر یار کا
بے تابیوں سے لطف اٹھانے لگا ہوں میں

ہادی مچھلی شہر جونپوری

زباں تک جو نہ آئے وہ محبت اور ہوتی ہے
فسانہ اور ہوتا ہے حقیقت اور ہوتی ہے

نہیں ملتے تو اک ادنیٰ شکایت ہے نہ ملنے کی
مگر مل کر نہ ملنے کی شکایت اور ہوتی ہے

یہ مانا شیشۂ دل رونق بازار الفت ہے
مگر جب ٹوٹ جاتا ہے تو قیمت اور ہوتی ہے

نگاہیں تاڑ لیتی ہیں محبت کی اداؤں کو
چھپانے سے زمانے بھر کی شہرت اور ہوتی ہے

یہ مانا حسن کی فطرت بہت نازک ہے اے وامقؔ
مزاج عشق کی لیکن نزاکت اور ہوتی ہے،

وامق جونپوری

تو کسی راستے کا مسافر رہے
تیری ایک ایک ٹھوکر اٹھا لاؤں گی
اپنی بے چین پلکوں سے چن چن کے میں
تیرے رستے کے پتھر اٹھا لاؤں گی

میں ورق پیار کا موڑ سکتی نہیں
زندگی میں تجھے چھوڑ سکتی نہیں
تو اگر میرے گھر تک نہیں آئے گا
میں ترے پاس ہی گھر اٹھا لاؤں گی

آنسوؤں کا یہ موسم چلا جائے گا
میرے لب پر تبسم بھی آ جائے گا
مجھ کو دل کی زمیں سے تم آواز دو
آسماں اپنے سر پہ اٹھا لاؤں گی

میرے ہر خواب کی تو ہی تعبیر ہے
تو ہی میرے خیالوں کی تصویر ہے
تیری آنکھوں سے دیکھوں گی میں
زندگی تیری پلکوں سے منظر اٹھا لاؤں گی

یہ زمانہ ہے صحرا صفت ہم نشیں
چند قطرے بھی اس سے نہ مل پائیں گے
دیکھ تو مجھ سے کہہ کر کسی روز تو
تیری خاطر سمندر اٹھا لاؤں گی

تیرے ماتھے کی اک اک شکن کی قسم
میں عیادت کو رسماً نہیں آئی ہوں
میرے بیمار تیری دوا کے لئے
اپنا اک ایک زیور اٹھا لاؤں گی،

شبینہ ادیب

لیا جو اس کی نگاہوں نے جائزہ میرا
تو ٹوٹ ٹوٹ گیا خود سے رابطہ میرا

سماعتوں میں یہ کیسی مٹھاس گھلتی رہی
تمام عمر رہا تلخ ذائقہ میرا

چٹخ گیا ہوں میں اپنے ہی ہاتھ سے گر کر
مرے ہی عکس نے توڑا ہے آئنہ میرا

کیا گیا تھا کبھی مجھ کو سنگسار جہاں
وہیں لگایا گیا ہے مجسمہ میرا

جبھی تو عمر سے اپنی زیادہ لگتا ہوں
بڑا ہے مجھ سے کئی سال تجربہ میرا

عداوتوں نے مجھے اعتماد بخشا ہے
محبتوں نے تو کاٹا ہے راستہ میرا

میں اپنے گھر میں ہوں گھر سے گئے ہوؤں کی طرح
مرے ہی سامنے ہوتا ہے تذکرہ میرا

میں لٹ گیا ہوں مظفرؔ حیات کے ہاتھوں
سنے گی کس کی عدالت مقدمہ میرا

تھک گئے ہو تو تھکن چھوڑ کے جا سکتے ہو
تم مجھے واقعتاً چھوڑ کے جا سکتے ہو

ہم درختوں کو کہاں آتا ہے ہجرت کرنا
تم پرندے ہو وطن چھوڑ کے جا سکتے ہو

تم سے باتوں میں کچھ اس درجہ مگن ہوتا ہوں
مجھ کو باتوں میں مگن چھوڑ کے جا سکتے ہو

جانے والے سے سوالات نہیں ہوتے میاں
تم یہاں اپنا بدن چھوڑ کے جا سکتے ہو

جانا چاہو تو کسی وقت بھی خود سے باہر
اپنے اندر کی گھٹن چھوڑ کے جا سکتے ہو

عمار اقبال

اشکوں کو آرزوئے رہائی ہے روئیے
آنکھوں کی اب اسی میں بھلائی ہے روئیے

رونا علاج ظلمت دنیا نہیں تو کیا
کم از کم احتجاج خدائی ہے روئیے

تسلیم کر لیا ہے جو خود کو چراغ حق
دنیا قدم قدم پہ صبائی ہے روئیے

خوش ہیں تو پھر مسافر دنیا نہیں ہیں آپ
اس دشت میں بس آبلہ پائی ہے روئیے

ہم ہیں اسیر ضبط اجازت نہیں ہمیں
رو پا رہے ہیں آپ بدھائی ہے روئیے

عباس قمر

بہترین تربیت اور پہلی درس گاہ
ماں کی گود کو بچے کی پہلی درس گاہ کہا جاتا ہے۔
ایک تعلیم یافتہ ماں ہی بچوں کی بہتر انداز میں پرورش اور اخلاقی تربیت کر سکتی ہے،
جو آگے چل کر معاشرے کے اچھے اور ذمہ دار شہری بنتے ہیں۔

ادھر وہ ہاتھوں کے پتھر بدلتے رہتے ہیں
ادھر بھی اہل جنوں سر بدلتے رہتے ہیں

بدلتے رہتے ہیں پوشاک دشمن جانی
مگر جو دوست ہیں پیکر بدلتے رہتے ہیں

ہم ایک بار جو بدلے تو آپ روٹھ گئے
مگر جناب تو اکثر بدلتے رہتے ہیں

یہ دبدبہ یہ حکومت یہ نشۂ دولت
کرایہ دار ہیں سب گھر بدلتے رہتے ہیں

بیکل اتساہی

ہمیشہ دیر کر دیتا ہوں میں ہر کام کرنے میں
ضروری بات کہنی ہو کوئی وعدہ نبھانا ہو

اسے آواز دینی ہو اسے واپس بلانا ہو
ہمیشہ دیر کر دیتا ہوں میں

مدد کرنی ہو اس کی یار کی ڈھارس بندھانا ہو
بہت دیرینہ رستوں پر کسی سے ملنے جانا ہو

ہمیشہ دیر کر دیتا ہوں میں
بدلتے موسموں کی سیر میں دل کو لگانا ہو

کسی کو یاد رکھنا ہو کسی کو بھول جانا ہو
ہمیشہ دیر کر دیتا ہوں میں

کسی کو موت سے پہلے کسی غم سے بچانا ہو
حقیقت اور تھی کچھ اس کو جا کے یہ بتانا ہو

ہمیشہ دیر کر دیتا ہوں میں ہر کام کرنے میں۔۔۔۔۔

منیر نیازی