SHMU "Rifat Mëziu"

Sot u zhvillua mbledhja e fundit e Këshillit të Klasave për këtë vit shkollor.

Në këtë mbledhje u diskutua për përmbylljen e vitit shkollor, duke u ndalur te sukseset e arritura dhe sfidat me të cilat u përballëm gjatë këtij viti. Gjithashtu, u trajtuan çështje të ndryshme që lidhen me procesin edukativo-arsimor dhe mbarëvajtjen e punës në shkollë.

Në mbledhjen përmbyllëse, kujdestarët e klasave raportuan për suksesin e nxënësve, sjelljen e tyre dhe aspekte të tjera të rëndësishme që karakterizuan punën gjatë vitit shkollor 2025/2026.

Kolektivi dhe drejtoria e shkollës ishin për ngushëllime te familja Jashari me rastin e vdekjes së ushtarit të orëve të para të lirisë, komandantit Sahit Jashari.

Vazhdojnë sukseset e shkollës sonë
Në garat e diturisë në nivel komunal për vitin shkollor 2025–2026, të organizuara nga Drejtoria Komunale e Arsimit, shkolla jonë arriti suksese të shkëlqyera, duke zënë tri vendet e para në garat e Gjuhës shqipe, tri vendet e para në TIK dhe vendin e dytë në garat e Gjuhës angleze.
Urime nxënësve fitues për këtë arritje të merituar dhe falënderime për mësimdhënësit për përkushtimin dhe punën e tyre!

Me moton "Kujtojmë fëmijët martirë", në kuadër të shënimit të 1 Qershorit, nxënësit e klasave të shtata kujtuan fëmijët martirë të vrarë gjatë luftës së fundit.
Nën kujdesin e mësimdhënësve të Gjuhës shqipe, ata sollën në kujtesë sakrificën e 1432 fëmijëve, jetët e të cilëve u shuan nga dhuna dhe aparteidi serb.
Lavdi e përjetshme!

Nxënësja e shkollës sonë, Erleta Dajaku ka arritur një sukses të jashtëzakonshëm duke zënë vendin e dytë në Olimpiadën e Dytë të Përbashkët të Gjuhës Shqipe ndërmjet Kosovës dhe Shqipërisë.

Falënderim dhe mirënjohje e veçantë i shprehim mësimdhënëses Minire Geci për angazhimin profesional, mbështetjen dhe përgatitjen e vazhdueshme të nxënëses drejt këtij suksesi të rëndësishëm.

Shkolla jonë mbetet e përkushtuar në mbështetjen

Urime Erletës për këtë arritje dhe suksese të mëtejshme në rrugëtimin e saj akademik!

Nxënëset e shkollës sonë, Arita Shabani, Erza Gashi, Bledina Konjuhi dhe Erleta Dajaku, finaliste të Olimpiadës së Dytë të Gjuhës Shqipe në nivel shtetëror, dhe mësimdhënësja e tyre Minire Geci u pritën nga Kryetari i Komunës, Sami Lushtaku.
Me këtë rast, kryetari i përgëzoi nxënëset për suksesin e arritur dhe u uroi suksese të mëtejshme në rrugën e dijes.

Me krenari të madhe ndajmë suksesin e nxënëseve tona të talentuara nga ShMU “Rifat Mëziu”, - Arita, Erza, Bledina dhe Erleta, të cilat shkëlqyen në Olimpiadën Shtetërore dhe fituan të drejtën për ta përfaqësuar Kosovën në garën kombëtare.
Ky sukses i jashtëzakonshëm erdhi falë përkushtimit, talentit dhe punës së palodhshme të nxënëseve tona, si dhe udhëheqjes profesionale të mësimdhënëses Minire Geci.
Falënderojmë edhe prindërit për mbështetjen e vazhdueshme në rrugëtimin e tyre drejt suksesit.
Jemi krenarë me ju dhe ju urojmë shumë suksese në garat e ardhshme!

Falënderojmë poeten Majlindë Sinani Lulaj për kontributin e saj në pasurimin e bibliotekës së shkollës sonë. Majlinda ka dëshmuar dhe dëshmon se kauzat e mëdha nuk shuhen asnjëherë. Dikur e angazhuar për çështjen kombëtare, duke sakrifikuar shumë nga vetja, sot ajo vazhdon të japë kontributin e saj përmes penës dhe krijimtarisë letrare.
Faleminderit, drenicasja jonë!

Nxënësja e shkollës sonë, Rejana Vojvoda, nxënëse e klasës së gjashtë, ka siguruar pjesëmarrjen në gjysmëfinalen e garës ndërkombëtare “Hippo”, që do të mbahet në Venecia të Italisë.

Në emër të shkollës, e përgëzojmë edhe mësimdhënësen e gjuhës angleze, Albina Musliu, për punën dhe angazhimin e vazhdueshëm me nxënësit.

Rejanës i dëshirojmë shumë suksese në sfidat e radhës!

Në shkollën tonë janë zhvilluar vizita sistematike nga ekipet shëndetësore të QKMF Skenderaj për nxënësit e klasave të gjashta dhe të nënta.

Këto vizita kishin për qëllim vlerësimin e gjendjes shëndetësore të nxënësve dhe identifikimin e hershëm të problemeve të mundshme, duke kontribuar në mirëqenien dhe zhvillimin e tyre të shëndetshëm.

Falënderojmë stafin shëndetësor për përkushtimin dhe bashkëpunimin gjatë realizimit të këtyre vizitave.